Kulisha watu 4000.

¹Siku zile likakusanyika tena kundi la watu wengi; walipokosa vyakula, akawaita wanafunzi, akawaambia:

²Kundi hili la watu nalionea uchungu, kwa kuwa wameshinda kwangu siku tatu, wasione chakula.[#Mar. 6:34-44.]

³Kama ninawaaga, waende nyumbani kwao pasipo kula, watazimia njiani; tena wako waliotoka mbali.

⁴Wanafunzi wake walipomjibu: Hapa nyikani mtu atawezaje kuwashibisha watu hawa mikate?

⁵akawauliza: Mnayo mikate mingapi? Nao waliposema: Saba,

⁶akawaagiza hao watu wengi, wakae chini, kisha akaitwaa ile mikate saba, akashukuru, akaimega, akawapa wanafunzi wake, wawapangie; nao wakawapangia wao wa hilo kundi la watu.

⁷Tena walikuwa na visamaki vichache; navyo akaviombea, akasema, wawapangie hivi navyo.

⁸Wakala, wakashiba; kisha wakaokota makombo ya mikate yaliyosalia, yakawa makanda saba.[#5 Mose 28:5.]

⁹Nao walikuwa kama 4000. Kisha akawaaga, waende zao.

¹⁰Papo hapo akaingia chomboni pamoja na wanafunzi wake, akaja upande wa Dalmanuta.

Kutaka kielekezo.

¹¹Wakamtokea Mafariseo, wakanza kubisha naye, wakamjaribu wakitaka, afanye kielekezo kitokacho mbinguni.[#Yoh. 6:30.]

¹²Akapiga kite rohoni mwake, akasema: Mbona wao wa ukoo huu wanataka kielekezo? Kweli nawaambiani: Wao wa ukoo huu hawatapata kielekezo.

¹³Kisha akawaacha, akajipakia tena chomboni, akaenda zake ng'ambo.

¹⁴Walikuwa wamesahau kuchukua mikate; namo chomboni hawakuwa na mikate ila mmoja tu.

¹⁵Akawaonya akisema: Tazameni, jiangalieni kwa ajili ya chachu ya Mafariseo na chachu ya Herode![#Mar. 3:6; Luk. 12:1; 13:32.]

¹⁶Ndipo, walipoyafikiri na kusemezana wao kwa wao: Ni kwa sababu hatunayo mikate.

¹⁷Kwa kuwatambua akawaambia: Mbona mnafikiri hivyo, ya kuwa hamnayo mikate? Hamjaerevuka bado? Wala hamjajua maana? Mngaliko wenye mioyo iliyoshupaa?[#Mar. 6:52.]

¹⁸Macho mnayo, lakini hamwoni? Nayo masikio mnayo, lakini hamsikii?[#Yer. 5:21; Ez. 12:2.]

¹⁹Wala hamwikumbuki ile mikate mitano, nilipoimegea wale 5000? Hapo mlijaza makapo mangapi mkiokota makombo? Wakamwambia: Kumi na mawili.[#Mar. 6:41-44.]

²⁰Wala hamwikumbuki ile mikate saba, nilipoivunjia wale 4000, mlijaza makanda mangapi mkiokota makombo? Wakamwambia: Saba.[#Mar. 8:6-9.]

²¹Akawauliza: Hamjajua bado maana?

Kipofu wa Beti-Saida.

²²Walipoingia Beti-Saida, wakamletea kipofu, wakambembeleza, amguse.[#Mar. 6:56.]

²³Akaushika mkono wa kipofu, akamwongoza, watoke kijijini, akamtemea mate machoni, akambandikia mikono, akamwuliza: Kiko, unachokiona?[#Mar. 7:32-33; Yoh. 9:6.]

²⁴Yule akainua macho, akasema: Naona watu wanaotembea, wanaonekana kuwa kama miti.

²⁵Hapo akambandikia mikono tena machoni pake, akamwagiza kutazama tena; ndipo, macho yake yaliporudia kuwa mazima, akaona vitu vyote waziwazi, hata vilivyoko mbali.

²⁶Kisha akamtuma, aende nyumbani mwake, akisema: Kijijini usimwingie! Wala usimwambie mtu wa humu kijijini![#Mar. 7:36.]

Kuungama kwa Petero.

²⁷Yesu na wanafunzi wake wakatoka, waingie vijiji vya upande wa Kesaria-Filipi. Walipokuwa njiani, akawauliza wanafunzi wake akiwaambia: Watu hunisema kuwa ni nani?

²⁸Nao wakamwambia wakisema: Wanakusema kuwa u Yohana Mbatizaji, wengine: Elia, wengine: Mmoja wao wafumbuaji.[#Mar. 6:15.]

²⁹Kisha akawauliza: Lakini ninyi mnanisema kuwa ni nani? Petero akajibu akimwambia: Wewe ndiwe Kristo.

³⁰Ndipo, alipowatisha, wasimwambie mtu hilo neno lake.[#Mar. 9:9.]

Ufunuo wa mateso.

³¹Akaanza kuwafundisha, ya kuwa imempasa Mwana wa mtu kuteswa mengi na kukataliwa nao wazee na watambikaji wakuu na waandishi, mpaka auawe, kisha afufuke, siku tatu zitakapopita.

³²Neno hili akalisema waziwazi. Ndipo, Petero alipomchukua pembeni, akaanza kumtisha.

³³Naye akageuka nyuma, akawatazama wanafunzi wake, akamtisha Petero akisema: Niondokea hapa nyuma yangu, wewe Satani! Kwani wewe huyawazi mambo ya Kimungu, ila unayawaza ya kiwatu tu.

Kujiokoa.

³⁴Akaliita kundi la watu, limjie pamoja na wanafunzi wake, akawaambia: Mtu akitaka kunifuata mimi ajikataze mapenzi yake, ajitwishe nao msalaba wake, kisha anifuate!

³⁵Maana mtu anayetaka kuiokoa roho yake ataiangamiza. Lakini mtu atakayeiangamiza roho yake kwa ajili yangu mimi na kwa ajili ya Utume mwema ataiokoa.[#Mat. 10:39.]

³⁶Kwani mtu vinamfaa nini kuvichuma vya ulimwengu wote, roho yake ikiponzwa navyo?

³⁷Kwani mtu atoe nini, aikomboe roho yake?

³⁸Kwani mtu atakayenionea soni mimi na maneno yangu kwao wa kizazi hiki kilicho chenye ugoni na ukosaji, basi, naye Mwana wa mtu atamwonea soni huyo atakapokuja mwenye utukufu wa Baba yake pamoja na malaika watakatifu.[#Mat. 10:33.]