¹Akawaambia: Kweli nawaambiani: Miongoni mwao wanaosimama hapa wamo wengine, ambao hawatakuonja kufa, mpaka watakapouona ufalme wa Mungu, ukiisha kuja kwa nguvu.

Yesu anageuzwa sura.

²Baada ya siku sita Yesu akamchukua Petero na Yakobo na Yohana, akapanda pamoja nao peke yao pasipo watu wengine juu ya mlima mrefu. Huko akageuzwa sura yake machoni pao,

³nazo nguo zake zikawa nyeupe sana, zikamerimeta; nchini hakuna fundi anayeweza kuzing'aza hivyo.

⁴Wakatokewa na Elia pamoja na Mose, wakawa wakiongea na Yesu.

⁵Petero akasema akimwambia Yesu: Mfunzi mkuu, hapa ni pazuri kuwapo sisi, na tujenge vibanda vitatu, kimoja chako, na kimoja cha Mose, na kimoja cha Elia!

⁶Kwani hakujua, alilolisema, kwa maana waliingiwa na woga mkubwa.

⁷Kisha hapo pakawa na wingu, likawatia kivuli, sauti ikatoka winguni kwamba: Huyu ndiye mwanangu mpendwa, msikilizeni yeye![#Mar. 1:11; 5 Mose 8:15; Tume. 3:22; 2 Petr. 1:17.]

⁸Mara walipotazama huko na huko, hakuna waliyemwona, asipokuwa Yesu peke yake pamoja nao.

Kuja kwa Elia.

⁹Walipokuwa wakishuka mlimani, akawakataza, wasimsimulie mtu ye yote, waliyoyaona, isipokuwa hapo, Mwana wa mtu atakapokwisha kufufuka katika wafu.[#Mar. 8:30.]

¹⁰Wakalishika neno hili wakiulizana wao kwa wao: Huko kufufuka katika wafu maana yake nini?

¹¹Wakamwuliza wakisema: Waandishi husemaje: Sharti kwanza Elia aje?

¹²Akawaambia: Kweli, Elia anakuja kwanza, vyote avigeuze kuwa vipya. Kisha Mwana wa mtu ameandikiwaje, ya kuwa atateswa mengi na kubezwa?[#Yes. 53:3; Mal. 4:5.]

¹³Lakini nawaambiani: Elia amekwisha kuja, wakamtendea yote, waliyoyataka, kama alivyoandikiwa.[#1 Fal. 19:2-10; Mat. 11:14.]

Kijana mwenye pepo.

¹⁴Walipokuja kwa wanafunzi wakaona kundi la watu wengi lililowazunguka, hata waandishi walikuwapo wakibishana nao.

¹⁵Papo hapo kundi lote lilipomwona yeye, wakastuka, wakamwendea mbio, wakamwamkia.

¹⁶Akawauliza: Mnabishana nini nao?

¹⁷Mmoja wao wale watu wengi akamjibu: Mfunzi, nimemleta mwanangu kwako, ana pepo wa ububu.

¹⁸Napo pote anapomkamata anamsukumasukuma kwa nguvu, naye hutoka pofu na kukereza meno, kisha mwili wake hunyauka. Nami nikawaambia wanafunzi wako, wamfukuze huyo pepo, lakini hawakuweza.

¹⁹Naye akawajibu akisema: Enyi wa kizazi kisichomtegemea Mungu! Nitakuwapo nanyi mpaka lini? Nitawavumilia mpaka lini? Mleteni hapa, nilipo!

²⁰Wakampeleka kwake; naye alipomwona, mara pepo akamkumba, akaanguka chini, akafingirika na kutoka pofu.

²¹Akamwuliza baba yake: Hivyo vimempata tangu lini? Akasema: Tangu utoto wake;

²²mara nyingi humtupa motoni na majini, maana amwue. Lakini ukiweza kitu tusaidie ukituonea uchungu!

²³Yesu akamwambia: Ukiweza kumtegemea Mungu! Yote huwezekana kwake anayemtegemea Mungu.[#Mar. 11:23.]

²⁴Papo hapo baba wa kijana akapaza sauti akisema: Namtegemea Mungu; nisaidie, nisipomtegemea![#Luk. 17:5.]

²⁵Yesu alipoona, watu wengi wanavyomkusanyikia mbiombio, akamkaripia yule pepo mchafu akimwambia: Wee pepo uliye bubu na kiziwi, mimi nakuagiza, umtoke huyu, usimwingie tena!

²⁶Ndipo, alipolia, akamsukumasukuma kwa nguvu, akamtoka; naye akawa kama mfu, hata wengi wakasema: Amekufa.[#Mar. 1:26.]

²⁷Lakini Yesu akamshika mkono, akamwinua; ndipo, aliposimama.

²⁸Naye alipoingia nyumbani, wanafunzi wake wakamwuliza walipokuwa peke yao: Mbona sisi hatukuweza kumfukuza huyo?

²⁹Akawaambia: Pepo walio hivyo hawawezi kutoka, isipokuwa kwa nguvu ya kuomba na ya kufunga.

Ufunuo wa pili wa mateso.

³⁰Wakatoka kule, wakatembea huko katikati ya Galilea; naye hakutaka, mtu akivitambua.[#Yoh. 7:1.]

³¹Kwani alikuwa akiwafundisha wanafunzi wake na kuwaambia: Mwana wa mtu atatiwa mikononi mwa watu, nao watamwua; lakini akiisha kuuawa, siku zitakapopita tatu, atafufuka.[#Mar. 8:31; 10:32-34.]

³²Nao hawakulitambua neno hili, lakini wakaogopa kumwuliza.[#Luk. 18:34.]

Ukubwa.

³³Wakafika Kapernaumu. Alipokuwa nyumbani akawauliza: Njiani mlibishana nini?[#Mat. 17:24.]

³⁴Wakanyamaza; maana walikuwa wameshindana njiani wao kwa wao kwamba: Aliye mkuu ni nani?

³⁵Akakaa, akawaita wale kumi na wawili, akawaambia: Mtu akitaka kuwa wa kwanza, sharti awafuate wenzake wote nyuma, awe mtumishi wao wote![#Mar. 10:16.]

³⁶Kisha akatwaa kitoto, akamsimamisha katikati yao, akamkumbatia, akawaambia:

³⁷Mtu atakayepokea kitoto mmoja aliye kama huyu kwa Jina languhunipokea mimi. Tena mtu akinipokea mimi hanipokei mimi, ila humpokea yule aliyenituma.[#Mat. 10:40; Yoh. 13:20.]

³⁸Yohana akamwambia: Mfunzi, tuliona mtu anayefukuza pepo kwa Jina lako, lakini hafuatani nasi; tukamzuia, kwani hakufuatana nasi.[#1 Kor. 12:3.]

³⁹Yesu akasema: Msimzuie! Kwani hakuna mwenye kufanya cha nguvu kwa ajina langua atakayeweza kipunde kidogo kunisema vibaya.

⁴⁰Kwani asiyetukataa yuko upande wetu.[#Mat. 12:30.]

⁴¹Kwani atakayewanywesha ninyi kinyweo cha maji tu, kwa sababu m wa Kristo, kweli nawaambiani Mshahara wake hautampotea kamwe.[#Mat. 10:42.]

⁴²Lakini mtu atakayekwaza mmoja tu aliye mwenzao hawa wadogo wanaonitegemea, itamwia vizuri zaidi, akitundikwa shingoni pake jiwe kubwa la kusagia, kisha atumbukizwe baharini.

⁴³Nawe, mkono wako ukikukwaza, uukate! Kuingia penye uzima mwenye kilema kutakufaa kuliko hapo, ukiwa mwenye mikono miwili, ukajiendea kuzimuni penye moto usiozimika.[#Mat. 5:30.]

⁴⁴Hapo ndipo, mdudu mwenye kuwaumiza asipokufa, tena ndipo, pasipozimika moto.[#Yes. 66:24.]

⁴⁵Nawe, mguu wako ukikukwaza, uukate! Kuingia penye uzima, ukiwa kiwete, kutakufaa kuliko hapo, ukiwa mwenye miguu miwili, ukatupwa shimoni mwa moto.

⁴⁶Hapo ndipo, mdudu mwenye kuwaumiza asipokufa, tena ndipo pasipozimika moto.[#Mar. 9:44.]

⁴⁷Nalo jicho lako likikukwaza, basi, ling'oe, ulitupe mbali! Kuuingia ufalme wa Mungu mwenye chongo kutakufaa kuliko hapo, ukiwa mwenye macho mawili ukatupwa shimoni mwa moto.[#Mat. 5:29.]

⁴⁸Hapo ndipo, mdudu mwenye kuwaumiza asipokufa, tena ndipo, pasipozimika moto.[#Mar. 9:44,46.]

⁴⁹Kwani chumvi ya kumkoleza mtu ye yote ni moto.[#3 Mose 2:13.]

⁵⁰Chumvi ni nzuri; lakini chumvi ikiwa imepotewa na ukolezi, mtaitia kitu gani, ipate kukolea tena? Mwe na chumvi mioyoni mwenu! Tena mwendeane kwa utengemano![#Mat. 5:13; Luk. 14:34; Kol. 4:6.]