Kumshinda mfalme wa Aradi.

¹Mfalme wa Kikanaani wa Aradi aliyekaa upande wa kusini aliposikia, ya kuwa Waisiraeli wanakuja wakiifuata njia ya wapelelezi, akapigana nao Waisiraeli, akateka wengine wa kwao.

²Ndipo, Waisiraeli walipomwapia Bwana kiapo cha kwamba: Ukiwatia watu hawa mikononi mwetu, tutaiangamiza miji yao kwa kuitia mwiko wa kuwapo.[#5 Mose 13:15; Yos. 6:17; Amu. 1:17; 1 Sam. 15:3.]

³Bwana akazisikia sauti zao Waisiraeli, akawapa hao Wakanaani, nao wakawaangamiza wao pamoja na miji yao kwa kuitia mwiko wa kuwapo; kwa hiyo wakapaita mahali pale Horma (Mwiko).[#4 Mose 14:45.]

Nyoka ya shaba.

⁴Kisha wakaondoka kwenye mlima wa Hori wakishika njia ya kwenda kwenye Bahari Nyekundu, waizunguke nchi ya Edomu. Watu walipotaka kuzimia roho kwa kuchoka njiani,

⁵wakamgombeza Mungu, hata Mose kwamba: Kwa nini mlitutoa Misri, tujifie huku nyikani? Kwani hakuna chakula wala maji, nazo roho zetu zinachukizwa na chakula hiki kikosacho nguvu.

⁶Ndipo, Bwana alipotuma nyoka za moto kuwajia hao watu; nao walipowauma watu, wakafa watu wengi kwao Waisiraeli.[#1 Kor. 10:9.]

⁷Ndipo, watu walipomjia Mose, wakasema: Tumekosa tulipomgombeza Bwana, hata wewe. Tuombee kwake Bwana, awaondoe hawa nyoka kwetu! Mose alipowaombea hao watu,

⁸Bwana akamwambia Mose: Jitengenezee nyoka ya moto, uitungike kuwa kielekezo! Itakuwa, kila aliyeumwa na nyoka atakapoitazama atapona.[#Yoh. 3:14.]

⁹Mose akatengeneza nyoka ya shaba nyekundu, akaitungika kuwa kielekezo, ikawa hivyo: nyoka alipomwuma mtu, naye akaitazama hiyo nyoka ya shaba, akapona.

Makambi ya Waisiraeli.

Waisiraeli walipoondoka huko, wakapiga makambi Oboti.

¹⁰Walipoondoka Oboti wakapiga makambi Iye-Abarimu katika nyika inayoelekea Moabu upande wa maawioni kwa jua.

¹¹Walipoondoka huko, wakapiga makambi kwenye kijito cha Zeredi.[#4 Mose 33:43-49.]

¹²Walipoondoka huko, wakapiga makambi kwenye kijito cha Zeredi.

¹³Walipoondoka huko wakapiga makambi ng'ambo ya huko ya Arnoni ulioko nyikani, utokao mipakani kwa Waamori, kwani Arnoni ulikuwa mpaka wa Wamoabu kuwatenga Wamoabu na Waamori.

¹⁴Kwa hiyo inasemwa katika kitabu cha vita vya Bwana:[#Yos. 10:13.]

¹⁵Bonde la Sufa na vijito vya Arnoni,

napo vijito vinaposhukia,

panapopafikia napo mahali penye mji wa Ari

ndipo panapouegemea mpaka wa Moabu.

¹⁶Toka hapo wkafika Kisimani;

ndiko kwenye kile kisima, Bwana

alikomwambia Mose kwamba: Wakusanye watu, niwape maji!

¹⁷siku zile Waisiraeli waliuimba wimbo huu:

¹⁸Bubujika, kisima! Haya! Kiimbieni!

Waliokichimba kisima hiki ndio wakuu;

kweli majumbe wa watu ndio waliokifukua.

kwa kutumia bakora na fimbo zao za kifalme.

Toka huko nyikani wakaenda Matana.

¹⁹Toka Matana wakaenda Nahalieli, toka Nahalieli wakaenda Bamoti,

²⁰toka Bamoti wakaenda bondeni kwenye mbuga za Moabu zilizoko kwenye mlima na Pisiga uelekeao jangwani.

Kumshinda Sihoni.

²¹Waisiraeli wakatuma wajumbe kwa Sihoni, mfalme wa Waamori, kwamba:[#5 Mose 2:26-37.]

²²Tunataka kupita katika nchi yako; hatutaondoka njiani kuingia mashambani au mizabibuni, wala hatutakunywa maji ya visimani, ila tunataka kuishika njia ya mfalme tu, hata tuupite mpaka wako mwingine.[#4 Mose 20:17.]

²³Lakini Sihoni hakuwapa wana wa Isiraeli ruhusa kupita mipakani kwake, ila Sihoni akawakusanya watu wake wote, akatoka kwenda nyikani kuwazuia Waisiraeli. Alipofika Yasa akapigana nao Waisiraeli.

²⁴lakini Waisiraeli wakampiga kwa ukali wa panga, wakaichukua nchi yake toka mto wa Arnoni mpaka mto wa Yakobo, wana wa Amoni walikokaa, kwani mipaka yao wana wa Amoni ilikuwa yenye nguvu.

²⁵Waisiraeli wakaiteka hiyo miji yote, kisha Waisiraeli wakakaa katika miji yote ya Waamori, namo Hesiboni na katika mitaa yake yote.

²⁶Kwani Hesiboni ulikuwa mji wa Sihoni, mfalme wa Waamori; naye aliupigania kale na mfalme wa Moabu, ndipo, alipoichukua hiyo nchi yake na kuitoa mkononi mwake mpaka mto wa Arnoni.

²⁷Kwa hiyo wenye kutunga mafumbo walisema:

Njoni Hesiboni, mji wa Sihoni ujengwe na kutiwa nguvu!

²⁸Kwani moto umetoka Hesiboni,

miali ya moto imetoka mjini mwa Sihoni,

ikaula mji wa Ari wa Moabu nao wenyeji wa vilimani

kwa Arnoni.

²⁹Umepatwa na mambo, wewe Moabu!

Mmeangamia ninyi, watu wa Kemosi!

Wamewakimbiza wana wenu wa kiume,

nao wana wenu wa kike wamempa Sihoni, mfalme wa Waamori!

³⁰Tulipowapiga mishale, ndipo, Hesiboni ulipoangamia mpaka Diboni, tukaiharibu nchi mpaka Nofa, tukafika hata Medeba.

³¹ndipo, Waisiraeli walipokaa katika nchi ya Waamori.

Kumshinda Ogi.

³²Kisha Mose akatuma watu kwenda Yazeri kupeleleza, nao wakaiteka mitaa yake na kuwafukuza Waamori waliokuwamo.

³³Kisha wakageuka, wakaishika njia ya kupanda Basani. Lakini Ogi, mfalme wa Basani, akatoka kuwazuia, yeye na watu wake wote, wakapigana huko Edirei.[#5 Mose 3:1-11.]

³⁴Bwana akamwambia Mose: Usimwogope, kwani nimemtia mkononi mwako pamoja na watu wake wote, hata nchi yake, umfanyizie, kama ulivyomfanyizia Sihoni, mfalme wa Waamori, aliyekaa Hesiboni.[#Sh. 136:17,22.]

³⁵ndipo, walipompiga yeye na wanawe na watu wake wote, wasisaze kwake hata mmoja aliyeweza kukimbia, kisha wakaitwaa nchi yake.