Kuomba kwa mnyonge, Sioni ujengwe tena.

¹Maombo ya mnyonge; kwa kufikisha kuzimia roho anamtolea Bwana wasiwasi wake.

²Bwana, lisikilize ombo langu! Kilio changu sharti kifike kwako wewe.

³Usiufiche uso wako, nisiuone ninaposongeka! Nitegee sikio lako, ninapokuita, uniitikie upesi!

⁴Kwani siku zangu hupotea kama moshi, nayo mifupa yangu huchomwa kama vijinga vya moto.

⁵Moyo wangu umeungua, ukanyauka kama majani, kwa hiyo mimi husahau kula chakula changu.

⁶Kwa hivyo, ninavyolia na kupiga kite, nyama za mwili wangu zimegandamana nayo mifupa.[#Iy. 19:20.]

⁷Nimefanana na korwa wa huko jangwani, nikawa kama bundi akaaye mahameni.

⁸Ninalala macho kwa kulia, ninafanana na ndege aliyeachwa peke yake kipaani juu.

⁹Siku zote adui zangu hunisimanga, hunizomea na kuapa, nipatwe na mabaya.

¹⁰Kwani ninakula uvumbi, kama ni mkate, navyo vinywaji vyangu ninavichanganya na machozi,[#Sh. 80:6.]

¹¹kwa sababu umenitolea makali na kunichafukia, kisha ukanikamata, ukanibwaga.

¹²Siku zangu ni kama kivuli kilicho kirefu, nami nimenyauka kama majani.[#Sh. 90:5; Iy. 14:2.]

¹³Lakini wewe, Bwana, utakaa kale na kale, kwa vizazi na vizazi utakumbukwa.

¹⁴Wewe utakapoinuka, uhurumie Sioni! Kwani siku za kuuonea uchungu sasa ziko, kweli imekwisha kufika saa yake.[#Sh. 14:7.]

¹⁵Kwani watumishi wako hupendezwa, mawe yake yakitumiwa; tena jinsi yanavyokaa uvumbini, inawatia uchungu.

¹⁶Ndipo, wamizimu watakapoliogopa Jina lake Bwana, nao wafalme wote wa nchi watauogopa utukufu wako.

¹⁷Hapo, Bwana atakapokuwa ameujenga tena mji wa Sioni, ndipo, utakapokuwa umetokea nao utukufu wake.

¹⁸Atayageukia maombo yao walio wakiwa, maana yale maombo yao hakuyabeza.

¹⁹Hayo sharti yaandikiwe vizazi vitakavyozaliwa nyuma, nao wa ukoo utakaoumbwa sharti wamshangilie Bwana.

²⁰Kwani alichungua toka Patakatifu pake palipo juu toka mbinguni aliitazama nchi hii,

²¹awasikilize waliofungwa, wakimpigia kite, nao walio wana wa kifo awafungulie njia,[#Sh. 79:11.]

²²wapate kulitangaza mle Sioni Jina lake Bwana pamoja na kumshangilia mlemle Yerusalemu,

²³makabila ya watu yatakapokusanyika yote pia pamoja na wafalme, wamtumikie Bwana.[#Sh. 87:4.]

²⁴Njiani alizipunguza nguvu zangu, nazo siku zangu akazifupiza.

²⁵Nikasema: Mungu wangu, usiniondoe, siku zangu simefika kati tu! Miaka ikaayo kwa vizazi na vizazi ni yako wewe.[#Sh. 55:24.]

²⁶Huko kale uliiweka misingi ya nchi, mbingu nazo ni kazi ya mikono yako wewe.[#Sh. 20:2; Ebr. 1:10-12.]

²⁷Hizo zitaangamia, lakini wewe utasimama. Kweli, zote zitachakaa kama nguo; utakapozigeuza kama vazi, ndipo, zitakapogeuka.[#2 Petr. 3:10.]

²⁸Lakini wewe ndiwe yuleyule uliyekuwa kale, miaka yako haitakoma.[#Sh. 102:13.]

²⁹Wana wa watumishi wako watakaa nao, nao wa uzao wao watakaa usoni pako wakiwa wenye nguvu.[#1 Yoh. 2:17.]