Mtukuze Bwana, roho yangu!

¹Mtukuze Bwana, roho yangu! Navyo vyote vilivyomo ndani yangu mimi na vilitukuze Jina lake lililo takatifu!

²Mtukuze Bwana, roho yangu! Usiyasahau mema yote, aliyokutendea!

³Alikuondolea manza zote, ulizozikora, nayo magonjwa yako yote akayaponya.[#Sh. 32:1.]

⁴Akazikomboa roho zako kuzimuni, kisha akakufunga kilemba, ndio magawio ya upole.[#Sh. 5:12.]

⁵Amekushibisha mema, yawe urembo wako; ujana wako ukarudi kuwa mpya kama ule wa kozi.[#Yes. 40:31.]

⁶Bwana hufanya yenye wongofu na kuwaamulia wote wakorofikao.

⁷Alimjulisha Mose njia zake, wana wa Isiraeli aliwajulisha matendo yake.[#2 Mose 33:13.]

⁸Bwana ni mwenye huruma na mwenye utu, tena ni mwenye uvumilivu na mwenye upole mwingi.[#Sh. 86:15; 2 Mose 34:6.]

⁹Hatagomba kale na kale, wala hatayashika makali siku zote.[#Yes. 57:16.]

¹⁰Hatatufanyizia yapasayo makosa yetu, wala hatatulipisha manza, tulizozikora.

¹¹Kwani kama mbingu zinavyokuwa juu ya nchi, ndivyo, upole wake unavyokua kwao wamwogopao.[#Sh. 36:6; Yes. 55:8-9.]

¹²Kama maawioni na machweoni kunavyokaliana mbali, ndivyo, alivyoyaweka maovu yetu, yatukalie mbali.

¹³Kama baba anavyowaonea uchungu walio wanawe, ndivyo, Bwana anavyowaonea uchungu wao wamwogopao.

¹⁴Kwani yeye anajua, jinsi alivyotuumba, hukumbuka, ya kuwa sisi tu mavumbi.[#1 Mose 2:7; 3:19; Iy. 10:9.]

¹⁵Mtu siku zake hufanana nayo majani, huchanua kama ua la porini;[#Sh. 90:5-6; 1 Petr. 1:24-25.]

¹⁶lakini upepo ukipita juu yake, haliko tena, wala watu hawapatambui tena mahali, lilipokuwa.

¹⁷Lakini upole wake Bwana huwakalia wamwogopao tangu kale hata kale, nao wongofu wake huwakalia wana kwa wana[#Omb. 3:22; Luk. 1:50.]

¹⁸kwao walishikao Agano lake na kuliangalia nako kwao wayakumbukao maagizo yake, wayafanye.

¹⁹Bwana alikisimamaisha mbinguni kiti chake cha kifalme, ufalme wake unawatawala watu wote pia.

²⁰Mtukuzeni Bwana, ninyi malaika zake! Nanyi wakuu wa vikosi mlio wenye nguvu, mlifanyao Neno lake, mkilisikiliza hilo Neno lake, sauti yake ikitokea![#Sh. 29:1; Yes. 6:1-4; Dan. 7:10.]

²¹Mtukuzeni Bwana, ninyi vikosi vyake vyote! Nanyi watumishi wake myafanyao yampendezayo!

²²Mtukuzeni Bwana, matendo yake yote mahali po pote, anapotawala! Mtukuze Bwana, roho yangu![#Sh. 148.]