Utukufu wake Mungu wa kuuumba ulimwengu.

¹Mtukuze Bwana, roho yangu! Bwana Mungu wangu, u mkuu kabisa, yenye urembo na utukufu umeyavaa.

²Umejivika mwanga, kama ni kanzu, ukazitanda mbingu kama nguo za hema.

³Makao yake ya juu aliyawekea misingi ya majini, huyatumia mawingu kuwa gari lake, juu ya mabawa ya upepo hujiendea.

⁴Huwatumia malaika zake kuwa upepo, nao watumishi wake kuwa mioto iwakayo.[#Ebr. 1:7.]

⁵Aliishikiza nchi kwenye misingi yake, haitayumbayumba kale na kale;

⁶ukaivika vilindi vya maji, kama ni nguo, nako vileleni kwenye milima juu kulikuwa na maji, nayo yalikuwa yametulia kuko huko.

⁷Ulipoyakemea, yakakimbia, ulipoyapigia sauti za ngurumo, yakapiga mbio kujiendea.[#Sh. 74:12-13; Iy. 38:8-11.]

⁸Milima ikainukia kwendelea juu, mabonde yakatelemkia hapohapo, ulipoyatengenezea.

⁹Ukakata mipaka, maji yasiipite, yasirudi tena kuifunika nchi.

¹⁰Namo mabondeni ukatokeza chemchemi za maji, maji yapate kupita katikati ya milima.[#Sh. 74:15.]

¹¹Nyama wote wa porini wakapata ya kunywa hukomesha kiu humo akina punda milia.

¹²Nao ndege wa angani hukaa kando ya maji, hupiga nyimbo zao wakikaa katika matawi ya miti.

¹³Milima ukainywesha maji yatokayo juu, ukaishibisha nchi mapato ya kazi zako.

¹⁴Ukachipuza majani, nyama wapate kula, nayo maboga, watu wayatumie; ndivyo, ulivyovitoa vilaji huku mchangani,[#Sh. 147:8.]

¹⁵hata mvinyo zifurahishazo mioyo ya watu, nayo mafuta ya kuzing'aza nyuso zao, nayo mikate itiayo nguvu mioyoni mwa watu.[#Amu. 9:13; Mbiu. 10:19.]

¹⁶Hata miti ya Bwana hunywa, mpaka ishibe, kama miangati ya Libanoni, aliyoipanda yeye.

¹⁷Ndimo, ndege wanamojenga viota vyao, nazo nyumba zao makorongo ziko katika mivinje.

¹⁸Kwenye milima mikubwa ndiko, minde wanakokaa, magenge ni kimbilio lao wale pelele.

¹⁹Uliumba mwezi wa kujulisha vilimo, jua hupajua pake pa kuchwea.[#Sh. 19:7; 74:16.]

²⁰Ukaiweka nayo giza, usiku uwepo; ndipo, nyama wa porini wanapotembea wote,

²¹wana wa simba hunguruma wakikosa nyama wa kukamata; ndivyo, wanavyomwuliza Mungu chakula chao.

²²Jua linapokucha, wale hurudi kwao mapangoni mwao, wapate kulala.

²³Kisha hutokea watu kwenda kazini, watumikie huko kazini mpaka jioni.

²⁴Uliyoyafanya, Bwana, ni makuu, tena ni mengi! Yote pia uliyafanya kwa ubingwa ulio wa kweli, hivyo nchi ikapata kijana viumbe vyako.[#1 Mose 1:31.]

²⁵Hapo ni bahari iliyo kubwa na pana pande zote; humo ndimo, wanamofurika wadudu wasiohesabika kabisa, tena nyama wadogo nao wakubwa.

²⁶Humo zinapita nazo merikebu zenye mizigo, tena wamo nondo, uliowaumba wa kuchezea mle.

²⁷Hawa wote wanakuelekea wakikutazamia, uwape vilaji vyao, wanapoona njaa.[#Sh. 145:15-16.]

²⁸Ukiwapa, hukusanya, tena hulimbika, unapokifumbua kiganja chako, hushiba mema yako.

²⁹Ukiuficha uso wako, wataguiwa na kituko, ukiondoa pumzi zao, huzimia, kisha hurudi uvumbini.[#1 Mose 3:19.]

³⁰Unapoituma pumzi yako, wanaumbwa, nao uso wa nchi huurudishia upya.

³¹Utukufu wake Bwana ni wa kale na kale, naye Bwana huzifurahia kazi, alizozifanya.

³²Akiitazama nchi, inatetemeka; akiigusa milima, inatoka moshi.[#Sh. 144:5.]

³³Siku zangu zote za kuwapo nitamwimbia Bwana, nitampigia Mungu wangu shangwe nikingali nipo.

³⁴Nyimbo zangu, nilizozitunga, na zimpendeze! Mimi ninayemfurahia, ndiye Bwana.

³⁵Wakosaji sharti wamalizwe, wasiwepo nchini tean! Mtukuze Bwana, roho yangu! Haleluya!