Matendo ya Mungu ya kuwaokoa Waisiraeli.

¹Mshukuruni Bwana, nalo Jina lake litambikieni! Yajulisheni makabila ya watu matendo yake![#Yes. 12:4.]

²Mpigieni shangwe za kumwimbia! Mataajabu yake yote yatungieni tenzi!

³Lishangilieni Jina lake lililo takatifu! Mioyo yao wamtafutao Bwana na ifurahi!

⁴Mchungulieni Bwana nazo nguvu zake! Utafuteni uso wake siku zote!

⁵Yakumbukeni mataajabu yake, aliyoyafanya, nayo maamuzi yake yashangazayo yakisemwa na kinywa chake!

⁶Ninyi mlio wa uzao wake Aburahamu aliyemtumikia, nanyi wana wa Yakobo, yeye aliyemchagua!

⁷Yeye Bwana ni Mungu wetu, nchi zote anaziamua.

⁸Kale na kale analikumbuka Agano lake. aliowaagiza kulishika Neno lake, ni vizazi elfu.

⁹Agano ni lile, alilomwekea Aburahamu, nacho kiapo ni kile, alichomwapia Isaka.

¹⁰Mbele yake Yakobo naye akalisimamisha kuwa maongozi, Agano lakale na kale liwe kwake Isiraeli

¹¹kwamba: Wewe ndiwe, nitakayekupa nchi ya Kanaani, iwe fungu lenu, nililowapimia.[#1 Mose 12:7.]

¹²Vilikuwa hapo, walipokuwa kikundi cha watu wanaohesabika, maana kule walikuwa wachache tu, tena wageni.

¹³Wakawaendea watu wa huko, taifa kwa taifa, walipotoka kwa mfalme mmoja, wakawajia wenziwe.

¹⁴Lakini hakuna mtu, aliyempa ruhusa kuwakorofisha, hata wafalme akawapatiliza kwa ajili yao kwamba:[#1 Mose 12:17; 20:3,7.]

¹⁵Niliowapaka mafuta msiwaguse tu, wala wafumbuaji wangu msiwafanyizie mabaya!

¹⁶Akaita njaa, ije kuziingia nchi za watu, akaivunja miti yote izaayo vilaji.[#1 Mose 41:54.]

¹⁷Hapo alikuwa amekwisha kujipatia mtu, awafungulie njia, ni Yosefu aliyekuwa ameuzwa kuwa mtumwa.[#1 Mose 37:28.]

¹⁸Huyo miguu yake waliiumiza kwa kuitia katika mapingu, kisha wakamfunga mwenyewe kwa minyororo

¹⁹mpaka siku ile, lilipotimia lile neno lake; naye alikuwa ameng'azwa kwa kuyeyushwa na maneno yake Bwana.

²⁰Ndipo, mfalme alipotuma, akamfungua; mtawala makabila ya watu akamtoa kifungoni.[#1 Mose 41:14.]

²¹Akamsimamisha kuwa bwana nyumbani mwake na mtunzaji wa mali, alizokuwa nazo zote,

²²awafunge wakuu wake, kama apendavyo; kisha awafundishe wazee wake, waerevuke.

²³Ndipo, Waisiraeli walipokuja huko Misri, Yakobo akawa mgeni katika nchi ya Hamu.[#1 Mose 46:1.]

²⁴Bwana akawapa wao walio ukoo wake kuzaa sana, akawatia nguvu kuliko wao waliowasonga.[#2 Mose 1:7,12.]

²⁵Kisha akaigeuza mioyo yao wale, wawachukize walio ukoo wake, wakawaendea watumishi wake kwa udanganyifu.

²⁶Ndipo, alipomtuma mtumishi wake, yule Mose, naye Haroni, aliyemchagua.

²⁷Hao wakafanya kwao vielekezo, alivyokuwa aliwaambia, wakavifanya vioja vyake katika nchi ya Hamu.[#2 Mose 3—12.]

²⁸Akatuma giza, likaiguia nchi yao, nao hawakukataa kuyatii maneno yake.

²⁹Akayageuza maji yao kuwa damu. akawaua nyama wote wa humo mtoni.

³⁰Nchi yao ikafurikiwa navyo vyura, wakaingia namo nyumbani mwa mfalme wao.

³¹Mbung'o wakaja papo hapo, aliposema, katika mipaka yao yote wakaingia nao mbu.

³²Penya mvua zao aliwanyeshea mvua ya mawe pamoja na mioto iliyoichoma nchi yao.

³³Akaipiga mizabibu yao, hata mikuyu yao, akaiponda miti iliyokuwako katika mipaka yao.

³⁴Nzige wakaja papo hapo, aliposema, pamoja na funutu wasiohesabika.

³⁵Wakala majani yote katika nchi yao. wakala navyo vilaji vyote mashambani kwao.

³⁶Akampiga kila mzaliwa wa kwanza katika nchi yao, ndio wote waliokuwa malimbuko yenye nguvu kwao.

³⁷Alipokwisha kuwapatia fedha na dhahabu, ndipo, alipowatoa, tena katika koo zao hakuwamo aliye mwenye kilema.[#2 Mose 12:35.]

³⁸Wamisri wakafurahi, walipotoka, kwani waliguiwa na kituko kilichowaogopesha.

³⁹Akatanda wingu, liwafunike, kisha liwe lenye moto, uwamulikie usiku.[#2 Mose 13:21.]

⁴⁰Walipomwomba, akaleta tombo, hata mikate alitoa mbinguni, akawashibisha.[#2 Mose 16:13-17; Yoh. 6:31.]

⁴¹Akafungua mwamba, maji yakabubujika, yakajiendea nyikani kama mto.[#2 Mose 17:6.]

⁴²Kwani alilikumbuka Neno lake lililo takatifu, alilomwambia mtumishi wake Aburahamu.

⁴³Ndivyo, alivyowatoa walio ukoo wake, wakafurahi, kwa kuwa wateule wake wakampigia vigelegele.

⁴⁴Nchi zao wamizimu ndizo, alizowapa, navyo, makabila mengine yalivyovisumbukia, wakavitwaa tu.

⁴⁵Alitaka hili tu: Wayaangalie maongozi yake, nayo Maonyo yake wayashike. Haleluya!