Kitabu cha tano.

Kumshukuru Mungu kwa kuwa mwokozi.

¹Mshukuruni Bwana, ya kuwa ni mwema! Ya kuwa upoke wake ni wa kale na kale![#Sh. 106:1.]

²Ndivyo, watakavyosema waliokombolewa na Bwana, aliowakomboa katika masongano.

³Ndio, aliowakusanya na kuwatoa katika nchi za ugeni, kule maawioni kwa jua nako macheoni kwake, nako kaskazini nako kwenye bahari.

⁴Walikuwa wamepotea nyikani katika njia za jangwani, mji uliokuwa wenye watu hawakuuona.

⁵Njaa ikawauma pamoja na kiu, roho zao zikataka kuzimia tu.

⁶Ndipo, walipomlilia Bwana kwa kusongeka hivyo, naye akawaopoa katika masumbuko yao.[#Sh. 107:13,19,28.]

⁷Akawaongoza katika njia iliyonyoka, wapate kufika mjini mwenye watu.

⁸Hao na wamshukuru Bwana, ya kuwa ni mpole! Huwafanyizia wana wa watu vioja vyake,[#Sh. 107:15,21,31.]

⁹hushibisha roho yenye kiu, nayo roho yenye njaa huipatia mema mengi.[#Luk. 1:53.]

¹⁰Wako wengine, walikaa gizani mwenye kufa, wakawa wamefungwa na kubanwa na vyuma.

¹¹Kwani walikataa kuyatii maneno yake Mungu, wakalibeza shauri lake yule Alioko huko juu.

¹²Kwa hiyo aliinyenyekeza mioyo yao kwa kuwatesa, nao walipojikwaa, hakuwako aliyewasaidia.

¹³Ndipo, walipomlilia Bwana kwa kusongeka hivyo, naye akawaokoa katika masumbuko yao.[#Sh. 107:6.]

¹⁴Akawatoa gizani mwenye kufa, yale mafungo yao nayo akayavunja.

¹⁵Hao na wamshukuru Bwana, ya kuwa ni mpole! Huwafanyizia wana wa watu vioja vyake.[#Sh. 107:8.]

¹⁶Kwani milango ya shaba anaivunja, nayo makomeo ya chuma anayakata.

¹⁷Wako wengine waliopumbazwa na kuumizwa kwa ajili ya njia zao zenye mapotovu na kwa ajili ya kukora manza.

¹⁸Vilaji vyote vikazichafua roho zao, mwisho wakajifikisha huko, malango ya kifo yaliko.

¹⁹Ndipo, walipomlilia Bwana kwa kusongeka hivyo, naye akawaokoa katika masumbuko yao.[#Sh. 107:6.]

²⁰Akalituma Neno lake, likawaponya, akawaopoa shimoni mwao.

²¹Hao na wamshukuru Bwana, ya kuwa ni mpole! Huwafanyizia wana wa watu vioja vyake.[#Sh. 107:8.]

²²Na wamtolee vipaji vya tambiko vya kumshukuru wakiyasimulia matendo yake na kushangilia.[#Sh. 50:14.]

²³Wako wengine waliosafiri baharini katika merikebu wakifuata uchuuzi kule kwenye maji mengi.[#Mat. 8:23-27.]

²⁴Nao waliyaona matendo ya Bwana na vioja vyake kwenye vilindi.

²⁵Kwa kusema tu alileta upepo wa kimbunga uliokweza mawimbi,

²⁶yakawapandisha juu kwenda mbinguni, tena wakatelemka chini vilindini, roho zao zikayeyuka kwa hayo mabaya.

²⁷Wakayumbayumba na kupepesuka kama mlevi, mizungu yao yote ikawa ya bure.

²⁸Ndipo, walipomlilia Bwana kwa kusongeka hivyo, naye akawatoa katika masumbuko yao.[#Sh. 107:6.]

²⁹Akakituliza kimbunga, kukawa kimya, mawimbi nayo yakanyamaza.

³⁰Kwa kuwa yamepata kutulia, wakafurahi, kisha akawaingiza bandarini, walikotaka kwenda.

³¹Hao na wamshukuru Bwana, ya kuwa ni mpole! Huwafanyizia wana wa watu vioja vyake.[#Sh. 107:8.]

³²Na wamtukuze kwenye mikutano ya watu walio wa ukoo wetu! Nako kwenye mashauri ya wazee na wamshangilie!

³³Aligeuza mito mikubwa kuwa nyika, nazo mboji za maji kuwa nchi kavu.

³⁴Nchi yenye wiva akaigeuza kuwa jangwa la chumvi kwa ajili ya ubaya wao waliokaa kule.[#1 Mose 19.]

³⁵Tena nyika aliigeuza kuwa bwawa lenye maji mengi, nayo nchi kavu akaitokeza mboji za maji,

³⁶akawapa wenye njaa ya kukaa hapohapo, wapajengee mji wa kukaa.

³⁷Wakalima mashamba, wakapanda mizabibu, wakajipatiamo matunda, ndio malipo ya kazi zao.

³⁸Kwa hivyo, alivyowabariki, wakawa wengi sana, nao nyama wa kufuga, aliowapa, hawakuwa wachache.

³⁹Kisha wakapunguka tena, wakainamishwa chini kwa kulemewa na mabaya yaliyowasikitisha.

⁴⁰Wakuu wao akawamwagia masimango, akawatangishatangisha maporini kusiko na njia zo zote.[#Iy. 12:21.]

⁴¹Lakini mkiwa alimkingia yale mateso, asifikiwe nayo, akaviweka vizazi vyake kuwa vingi kama kondoo.

⁴²Wanyokao mioyo walipoviona wakavifurahia kwamba: Wapotovu wote hufumbwa vinywa![#Iy. 22:19-20.]

⁴³Yuko nani aliye mwenye ujuzi? Na ayashike haya! Na autambue upole wake Bwana!