Kumcha Mungu kuna mbaraka.

¹Haleluya! Mwenye shangwe ni mtu amwogopaye Bwana, apendezwaye sana na maagizo yake.[#Sh. 1:1.]

²Wao wa uzao wake watakuwa wenye nguvu sana katika nchi hii, maana wanyokao mioyo vizazi vyao hubarikiwa.[#Fano. 20:7.]

³Malimbiko ya mali yamo nyumbani mwake, nao wongofu wake husimama kale na kale.

⁴Penye giza mwanga huwazukia wanyokao mioyo, ndio wenye utu na huruma nao wenye wongofu.[#Sh. 37:6.]

⁵Mtu mwenye huruma kwa kukopesha ataona mema, yeye atayatengeneza mashauri yake, yashinde kwenye hukumu.[#Sh. 41:2.]

⁶Kwani hatatikisika kale na kale, mwongofu ni mtu atakayekumbukwa kale na kale.

⁷Masingizio mabaya hayaogopi, moyo wake umeshupaa, maana humwegemea Bwana.

⁸Kwa kuwa na msingi wa moyo wake haogopi kamwe, mpaka atakapoona, wanavyofanyiziwa wao wamsongao.[#Sh. 91:8.]

⁹Alizimwaga mali zake, akawagawia wao waliozikosa; huu wongofu wake hukaa kale na kale, baragumu lake huwa limeelekezwa juu kwa kuwa lenye utukufu.[#2 Kor. 9:9.]

¹⁰Asiyemcha Mungu anaviona na kukasirika, hukereza meno, mwisho hupotea, tamaa zao wasiomcha Mungu huangamia.[#Sh. 35:16.]