Kuushukuru wokovu wa Mungu.

¹Nampenda Bwana, kwa kuwa husikia, huisikia sauti yangu, nikimlalamikia.

²Kwa kuwa hunitegea nami sikio lake, kwa hiyo nitamwitia siku zangu zote.

³Matanzi ya kifo yalikuwa yameninasa, masongano ya kuzimu yakanipata, kwa kuona masikitiko nikasongeka.[#Sh. 18:6; 116:8.]

⁴Nikalililia Jina la Bwana ya kwamba: Wewe Bwana, iopoe roho yangu!

⁵Bwana ni mwenye utu na mwenye wongofu, kwa kuwa Mungu wetu hutuonea uchungu.

⁶Walio kama wachanga Bwana huwalinda; nilipokuwa mnyonge, aliniokoa.

⁷Rudi, roho yangu, kwenye kituo chako! Kwani Bwana ndiye aliyekutendea mema.[#Sh. 42:6.]

⁸Maana umeiopoa roho yangu katika kufa, ukafuta machozi machoni pangu, ukaishika miguu yangu, isijikwae.

⁹Kwa kumtazamia Bwana nitaendelea vivyo hivyo katika nchi zao walio hai.[#Sh. 27:13; 56:13.]

¹⁰Nilikuwa nimemtegemea, kwa hiyo na niseme! Lakini nimeteseka sana mimi nami.[#2 Kor. 4:13.]

¹¹Hapo, niliposhikwa na woga, nilisema mimi: Watu wote walioko ni wenye uwongo.[#Rom. 3:4.]

¹²Nitawezaje kumrudishia Bwana mema yote, aliyonitendea?

¹³Nitakiinua kinyweo chenye wokovu, kisha nitalitambikia Jina lake Bwana.[#1 Kor. 10:16.]

¹⁴Nitamlipa Bwana, niliyomwapia, wote walio ukoo wake wavione na macho yao.[#Sh. 22:26.]

¹⁵Ni jambo kuu machoni pa Bwana, wamchao wakifa.[#Sh. 72:14.]

¹⁶Mimi nakuomba, Bwana, mimi mtumishi wako, mimi mtumishi wako ni mwana wa mjakazi wako, nawe umenifungulia mafungo yangu.

¹⁷Nitakutolea wewe vipaji vya tambiko vya kukushukuru, kisha nitalitambikia Jina lake Bwana.

¹⁸Nitamlipa Bwana, niliyomwapia, wote walio ukoo wake wavione na macho yao,

¹⁹katika nyua zake Nyumba ya Bwana, katikati mjini mwako, wewe Yerusalemu. Haleluya!