Utukufu wa Neno lake Bwana.

¹Wenye shangwe ndio wao wanaofuata njia zisizokosesha, wanaoendelea kuyafuata Maonyo yake Bwana.[#Sh. 1:1-2; 112:1.]

²Wenye shangwe ndio wao wanaoyashika mashuhuda yake, wanaomtafuta yeye kwa mioyo yote.

³Hawafanyi mapotovu hata kidogo, ila njia zake ndizo, wanazoendelea kuzishika.

⁴Amri zako ulizitoa wewe mwenyewe, watu wazishike kabisa na kuzifuata.

⁵Ninataka sana, njia zangu zishupazwe, niyashike maongozi yako.

⁶Kwa kuyatazama maagizo yako yote sitatwezeka.

⁷Na nikushukuru kwa moyo unyokao, nikijifundisha wongofu wako wa kuamua.

⁸Na niyashike maongozi yako na kuyafuata, nawe usiniache, niwe peke yangu.

⁹Kijana ataiangaliaje njia yake, iwe imetakata? Itakuwa hapo, atakapolishika Neno lako na kulifuata.

¹⁰Nimekutafuta kweli kwa moyo Wangu wote, usiniache, nikapotea na kutoka kwenye maagizo yako.

¹¹Moyoni mwangu nimeliweka Neno lako, nisije kukukosea.

¹²Utukuzwe, wewe Bwana! Nifundishe maongozi yako![#Sh. 119:26,64,68.]

¹³Kwa midomo yangu nimeyasimulia maamuzi yote ya kinywa chako

¹⁴nikaifurahia njia ya mambo, uliyoyashuhudia wewe, kama watu wanavyofurahiwa na mali zo zote.

¹⁵Amri zako na niziwaze moyoni na kuzitazama njia zako.

¹⁶Na nijichangamshe kwa maongozi yako, nisilisahau Neno lako![#Sh. 119:24,47,61; Rom. 7:22.]

¹⁷Mtendee mema mtumishi wako, nipate uzima tena! Na nilishike Neno lako na kulifuata!

¹⁸Yafumbue macho yangu, nipate kuona, niyaone mataajabu yatokeayo kwenye Maonyo yako.

¹⁹Mimi ni mgeni katika nchi, usinifiche maagizo yako![#Sh. 39:13.]

²⁰Roho yangu imepondeka kwa kuyatunukia hayo maamuzi yako mchana kutwa.

²¹Uliwakaripia wenye majivuno, wakawa wameapizwa, wakapotea kwa kuyaacha maagizo yako.[#5 Mose 27:26.]

²²Ondoa kwangu matwezo na mabezo! Kwani nayashika mashuhuda yako.

²³Wako nao wakuu wanaopiga mashauri ya kuniteta, lakini mtumishi wako anayoyawaza moyoni, ndiyo maongozi yako.

²⁴Mashuhuda yako hunichangamsha, ndiyo yanayoniongoza.[#Sh. 119:35.]

²⁵Ambayo roho yangu imegandamana nayo, ndiyo mavumbi; kwa hivi nirudishe uzimani, kama ulivyosema!

²⁶Nilipokusimulia, njia zangu zilivyo, uliniitikia; unifundishe maongozi yako, niyajue!

²⁷Unitambulishe njia ya amri zako, niyawaze mataajabu yako!

²⁸Roho yangu imeyeyuka kwa ukiwa; niinue, kama ulivyosema!

²⁹Njia ya uwongo ipitishe mbali, nisiione! Kwa huruma zako nipe kuyashika Maonyo yako!

³⁰Njia yenye kweli ndiyo, niliyoichagua, maamuzi yako nimeyaweka machoni pangu.

³¹Ambayo nimegandamana nayo, ndiyo mashuhuda yako; Bwana, usiniache, nikatwezwa!

³²Nitapiga mbio, nifike njiani kwa maagizo yako, kwani moyo wangu umeupatia mahali papana.

³³Nifunze, Bwana, niijue njia ya maongozi yako, niishike na kuifuata mpaka mwisho!

³⁴Nitambulishe Maonyo yako, niyashike, niyaangalie na kuyafuata kwa moyo wote.

³⁵Niendeshe katika mkondo wa maagizo yako! Kwani yanayonipendeza ndiyo hayo.[#Sh. 119:47.]

³⁶Uelekeze moyo wangu, uyatazame mashuhuda yako, usiyatazame tena mapato ya faida.

³⁷Yapitishe macho yangu, yasitazame mambo ya bure, ila yazitazame njia zako zinipazo uzima!

³⁸Mpatie mtumishi wako uliyomwambia! Naye akuogope!

³⁹Pitisha kwangu mambo yanitiayo soni! Kwani ninayaogopa, maana maamuzi yako ndiyo yaliyo mema.

⁴⁰Tazama, jinsi ninavyozitunukia amri zako! Nawe kwa wongofu wako nipe uzima!

⁴¹Magawio ya upole wako, Bwana, na yanijie! Uniokoe, kama ulivyosema!

⁴²Hivyo ndivyo, nitakavyomjibu anitukanaye, kwani egemeo langu ni Neno lako.

⁴³Usiliondoe kabisa kinywani mwangu hilo Neno lililo kweli! Kwani maamuzi yako ndiyo, ninayoyangojea.

⁴⁴Nami nitayaangalia Maonyo yako, niyafuate siku zote pasipo kukoma kale na kale.

⁴⁵Nitajiendea palipo papana kwa kuzitafuta amri zako.

⁴⁶Nayo mashuhuda yako nitayasimulia hata mbele ya wafalme pasipo kuona soni.[#Mat. 10:18; Rom. 1:16.]

⁴⁷Na nijichangamshe kwa maagizo yako, maana nimeyapenda.[#Sh. 119:16,70.]

⁴⁸Hata mikono yangu nitaiinulia maagizo yako kwa kuyapenda, nayo maongozi yako nitayawaza moyoni.

⁴⁹Likumbuke Neno lako, ulilomwambia mtumishi wako! Maana ulisema, nilingojee.

⁵⁰Hili ndilo lililonituliza moyo katika mateso yangu, kwani Neno lako ndilo lililonirudisha uzimani.[#Sh. 19:8.]

⁵¹Wenye majivuno hunifyoza na kuzidi sanasana, lakini sikuondoka kwenye Maonyo yako.

⁵²Ninapoyakumbuka maamuzi yako, Bwana, uliyoyaamua tangu kale, ndipo, ninapoutuliza moyo wangu.

⁵³Makali yenye moto yalikuwa yamenishika kwa ajili yao wasiokucha, walioyaacha nayo Maonyo yako.

⁵⁴Maongozi yako ndiyo, ninayoyaimbia namo nyumbani, nilimotua nilipokuwa mgeni.

⁵⁵Jina lako, Bwana, nalikumbuka nao usiku, niyashike Maonyo yako, niyafuate.

⁵⁶Hizo ndizo mali zangu, nilizozipata, kwa kuwa nimezishika amri zako.

⁵⁷Bwana ni fungu langu! ndivyo, nilivyosema; kwa hiyo nayashika maneno yako na kuyafuata.

⁵⁸Nikakulalamikia usoni pako kwa moyo wote, unihurumie, kama ulivyoniambia.

⁵⁹Nilipozitazama njia zangu, nikairudisha miguu yangu, nikaielekeza, iyafuate mashuhuda yako.

⁶⁰Sikujizuzua na mambo mengine mengine, ila nikapiga mbio. niyashike maagizo yako na kuyafuata.

⁶¹Matanzi yao wasiokucha yalikuwa yamenizunguka, lakini Maonyo yako sikuyasahau.[#Sh. 119:83.]

⁶²Nikiamka usiku wa manane, ninakushukuru, kwa ajili ya wongofu wako wa kuamulia watu.[#Sh. 42:9.]

⁶³Wenzangu mimi ndio wote wakuogopao wewe, wanaozishika amri zako na kuzifuata.

⁶⁴Upole wako, Bwana, ndio ulioieneza nchi. Nifundishe maongozi yako, niyajue![#Sh. 33:5.]

⁶⁵Mtumishi wako umemfanyizia mema, kama ulivyosema, Bwana.[#Sh. 119:17,41.]

⁶⁶Nifundishe utambuzi na ujuzi ulio mwema! Kwani maagizo yako nimeyategemea.

⁶⁷Nilipokuwa sijanyenyekezwa bado, nilikuwa nimepotea lakini sasa nimelishika Neno lako, nilifuate.[#Sh. 119:75; Yes. 28:19.]

⁶⁸Wewe ndiwe mwema, hufanya mema; nifundishe maongozi yako, niyajue.[#Sh. 119:12.]

⁶⁹Wenye majivuno wametunga uwongo wa kunisingizia, lakini mimi ninazishika amri zako kwa moyo wote.[#Sh. 119:78.]

⁷⁰Mioyo yao imenenepa kama yenye unono, nami huyachangamkia Maonyo yako.[#Sh. 119:77.]

⁷¹Kule kunyenyekezwa kumenifaa kwa kunifundisha maongozi yako.[#Sh. 118:21.]

⁷²Maonyo ya kinywa chako ni mema kwangu kuliko maelfu ya vipande vya dhahabu na vya fedha.[#Sh. 19:11.]

⁷³Mikono yako iliniumba na kunitengeneza; nipe kuvitambua, nijifundishe maagizo yako!

⁷⁴Wakuogopao hufurahi wakiniona mimi, kwani Neno lako ndilo, ninalolingojea.

⁷⁵Nimeyajua maamuzi yako, Bwana, kuwa yenye wongofu, maana umeninyenyekeza kwa welekevu.[#Sh. 119:67.]

⁷⁶Upole wako sharti uje, unitulize moyo, kama wewe ulivyomwambia mtumishi wako.[#Sh. 109:21.]

⁷⁷Machungu yako, uliyonionea, na yaje, nipatekuwa mzima tena! Kwani Maonyo yako hunichangamsha.[#Sh. 119:143.]

⁷⁸Wenye majivuno watapatwa na soni, kwani hunipotoa bure, lakini moyoni mwangu mimi ninaziwaza amri zako.[#Sh. 119:85-86.]

⁷⁹Wakuogopao na waje kuwa upande wangu pamoja nao wale wayajuao mashuhuda yako.

⁸⁰Moyo wangu sharti uwe pasipo kosa kwa nguvu ya maongozi yako, kusudi soni za kunipata zisinijie.

⁸¹Roho yangu imezimia kwa kuutunukia wokovu wako, lakini Neno lako ndilo, ninalolingojea.

⁸²Nayo macho yangu yamepata kiwi kwa kulichungulia Neno lako kwa kwamba: Itakuwa lini, utakaponituliza moyo?

⁸³Kwani nimekuwa kama kiriba kilichoanikwa katika moshi, lakini maongozi yako sikuyasahau.[#Sh. 119:93.]

⁸⁴Siku za mtumishi wako zilizobaki ni ngapi tena? Utawahukumu lini wao wanikimbizao?

⁸⁵Hawa wenye majivuno wamenichimbia mashimo, nao ndio wasioyafuata Maonyo yako.[#Sh. 119:69.]

⁸⁶Maagizo yako yote ni ya welekevu; lakini wao hunikimbiza bure, kwa hiyo nisaidie!

⁸⁷Ilikuwa imesalia kidogo, wangenitowesha huku nchini, lakini amri zako sikuziacha.

⁸⁸Kwa upole wako nirudishe uzimani! Ndipo, nitakapoyashika na kuyafuata mashuhuda ya kinywa chako.[#Sh. 119:149.]

⁸⁹Bwana, Neno lako ni la kale na kale, lilitiwa nguvu kule mbinguni.[#Yes. 40:8.]

⁹⁰Welekevu wako hukalia vizazi na vizazi. Ulipozishikiza nchi, zikapata kusimama;

⁹¹zimesimama mpaka leo kwa hivyo, ulivyozitengeneza, kwani vinavyokutumikia ni vyote pia.

⁹²Kama Maonyo yako yasingalinichangamsha, ningaliangamia kwa kuteseka.[#Sh. 119:50; Yer. 15:16.]

⁹³Kale na kale sitazisahau amri zako, kwani kwa nguvu zao umenirudisha uzimani.[#Sh. 119:109.]

⁹⁴Niokoe mimi niliye wako kwa kuzitafuta amri zako.[#Sh. 119:45.]

⁹⁵Wasiokucha huningojea, waniangamize; lakini mimi ninayatambua mashuhuda yako.

⁹⁶Kila kitu niliuona mwisho wake, siku zake zilipotimia, lakini agizo lako halina mpaka.

⁹⁷Maonyo yako nimeyapenda sanasana, ndiyo yaliyomo moyoni mwangu siku zote.[#Sh. 1:2.]

⁹⁸Maagizo yako hunierevusha kuliko adui zangu, Kwani kale na kale ndiyo yaliyoko kwangu.[#5 Mose 4:6.]

⁹⁹Akili zangu huzipita zao wafunzi wangu wote, kwani mashuhuda yako ndiyo, niyawazayo moyoni.

¹⁰⁰Kwa utambuzi ninawapita nao wazee, Kwani nimeziangalia amri zako.

¹⁰¹Miguu yangu nimeikataza kushika njia mbaya yo yote, nipate kulishika Neno lako na kulifuata.

¹⁰²Kwenye maamuzi yako sikuepuka, kwani wewe mwenyewe ulinifundisha, niyajue.

¹⁰³Maneno yako ni matamu peke yao katika ufizi wangu, kinywani mwangu ni matamu kweli kuliko asali.[#Sh. 19:11.]

¹⁰⁴Katika amri zako ndipo, utambuzi wangu ulipotoka; kwa hiyo ninachukizwa na kila njia ya uwongo.

¹⁰⁵Neno lako ni taa miguuni pangu, hunimulikia njiani pangu.[#2 Petr. 1:19.]

¹⁰⁶Nimejiapia, tena nitayafanya, niushike wongofu wako wa kuamua, niufuate.

¹⁰⁷Bwana, nimenyenyekezwa sanasana; nirudishe uzimani, kama ulivyosema![#Sh. 119:67,71.]

¹⁰⁸Vipaji, kinywa changu kinavyopenda kuvitoa, na vikupendeze, Bwana! Na unifundishe maamuzi yako, niyajue![#Sh. 19:14.]

¹⁰⁹Roho yangu nakupelekea mkononi mwangu siku zote, maana Maonyo yako sikuyasahau.[#Sh. 119:141; 1 Sam. 19:5.]

¹¹⁰Wamenitegea matanzi wao wasiokucha, lakini sikupotea na kuziacha hizo amri zako.

¹¹¹Mashuhuda yako ndio fungu langu la kale na kale, kwani ndiyo yanayoufurahisha moyo wangu.

¹¹²Nimeuelekeza moyo wangu na kwako, uyafanye maongozi yako kale na kale mpaka mwisho.

¹¹³Walio wenye mioyo miwili nimechukizwa nao, lakini Maonyo yako nimeyapenda.[#Sh. 31:7.]

¹¹⁴Wewe ndiwe ficho langu na ngao yangu, nalo Neno lako ndilo, ninalolingojea.[#Sh. 3:4.]

¹¹⁵Ondokeni kwangu, ninyi mfanyao mabaya! Mimi ninataka kuyashika maagizo yake Mungu wangu.

¹¹⁶Nishikize, kama ulivyoniambia, nipate uzima tena! Usinitie soni! Maana nimekungojea.

¹¹⁷Unitie nguvu, nipate kuokoka! Nami na niyatazame maongozi yako siku zote!

¹¹⁸Unawatupa wote wapoteao na kuyaacha maongozi yako, kwani udanganyifu wao ni wa bure.

¹¹⁹Wote wasiokucha huku nchini unawazoa kama mitapo ya chuma, kwa hiyo nimeyapenda mashuhuda yako.

¹²⁰Kwa kukuogopa sana nyama za mwili wangu zimeguiwa na kituko, nayo maamuzi yako ninayaogopa.

¹²¹Nimefanya yaliyo sawa yenye wongofu, usinitoe na kunitia mikononi mwao wanikorofishao.

¹²²Jitoe kuwa kole ya mtumishi wako, aone mema, wenye majivuno wasinikorofishe![#Sh. 19:14.]

¹²³Macho yangu yamepata kiwi kwa kuuchungulia wokovu wako na kwa kulichungulia Neno lako lililo lenye wongofu.

¹²⁴Mfanyizie mtumishi wako kwa upole wako! Nifundishe maongozi yako, niyajue!

¹²⁵Mimi ni mtumishi wako, nipe utambuzi, nipate kuyajua mashuhuda yako!

¹²⁶Siku zimetimia, Bwana afanye kitu, maana Maonyo yako wameyatengua.

¹²⁷Kwa hiyo nimeyapenda hayo maagizo yako kuliko dhahabu, ijapo ziwe nzuri zaidi.[#Sh. 19:11.]

¹²⁸Kwani ninaziwazia amri zako zote kuwa za wongofu, lakini njia yo yote ya uwongo nimechukizwa nayo.

¹²⁹Mashuhuda yako ni ya kustaajabu; hii ndiyo sababu, roho yangu ikiyashika.

¹³⁰Maneno yako yakifunuliwa huangaza, huwapa utambuzi nao waliopumbaa.[#Sh. 19:8.]

¹³¹Nimekifumbua kinywa changu, nikatweta kwa kuyatunukia maagizo yako.

¹³²Geuka, unielekee mimi na kunihurumia, kama inavyowapasa wao walipendao Jina lako!

¹³³Mwenendo wangu uutie nguvu, ulifuate Neno lako, upotovu uwao wote usije kunitawala![#Sh. 17:5.]

¹³⁴Katika makorofi ya watu na unikomboe! Nami na nizishike amri zako na kuzifuata!

¹³⁵Mwangazie mtumishi wako uso wako, unifundishe maongozi yako, niyajue!

¹³⁶Macho yangu yanatoka vijito vya maji kwa ajili yao wasioyashika Maonyo yako na kuyafuata.

¹³⁷Wewe Bwana ndiwe mwongofu, nayo maamuzi yako kunyoka.

¹³⁸Mambo yanayopasa, uyashuhudie wewe, umeyaagiza kuwa yenye wongofu na welekevu kabisa.

¹³⁹Wivu wa kunija umenizimisha roho, kwani wameyasahau maneno yako wao wanisongao.[#Sh. 69:10.]

¹⁴⁰Neno lako liko, limeng'azwa kabisa, kwa hiyo amelipenda mtumishi wako.

¹⁴¹Mimi ni mdogo, ninabezwa, lakini amri zako sikuzisahau.[#Sh. 119:153.]

¹⁴²Wongofu wako ndio wongofu ulio wa kale na kale, nayo Maonyo yako ndiyo ya kweli.

¹⁴³Masongano na mahangaiko yamenipata, lakini maagizo yako ndiyo yanayonichangamsha.[#Sh. 119:174.]

¹⁴⁴Mashuhuda yako ni yenye wongofu kale na kale, nipe kuyatambua, nipate uzima tena!

¹⁴⁵Nimeita kwa moyo wangu wote, niitikie, Bwana! Maongozi yako na niyashike!

¹⁴⁶Nimekuita wewe, na uniokoe! Nami nitayashika mashuhuda yako na kuyafuata.

¹⁴⁷Nimejidamka na mapema, nikulilie, Neno lako ndilo, ninalolingojea.[#Sh. 119:114.]

¹⁴⁸Zamu za usiku zinapokuwa hazijapokeana, niko macho, nipate kuliwaza Neno lako moyoni mwangu.

¹⁴⁹Isikie sauti yangu kwa upoke wako! Bwana, kwa hivyo, maamuzi yako yalivyo, nirudishe uzimani![#Sh. 119:88,154,159.]

¹⁵⁰Wakimbiliao mapotovu wamenikaribia, ndio watu walioyaacha mbali Maonyo yako.

¹⁵¹Wewe, Bwana, uko karibu, nayo maagizo yako yote ndiyo ya kweli.[#Sh. 119:86.]

¹⁵²Tangu kale ninayajua mashuhuda yako, nayo yalinifundisha, ya kuwa uliyawekea msingi, yawepo kale na kale.

¹⁵³Utazame ukiwa wangu, uniopoe! Kwani Maonyo yako sikuyasahau.[#Sh. 119:176.]

¹⁵⁴Nigombee kondo yangu, unikomboe! Nirudishe uzimani, kama ulivyoniambia!

¹⁵⁵Wokovu unawakalia mbali wao wasiokucha, kwani hawakuyatafuta maongozi yako!

¹⁵⁶Huruma zako, Bwana, ulizotupatia, huwa nyingi, kwa hivyo, maamuzi yako yalivyo, nirudishe uzimani!

¹⁵⁷Wanaonikimbiza nao wanaonisonga ndio wengi, lakini sikuondoka na kuyaacha mashuhuda yako.

¹⁵⁸Nikiwatazama waliorudi nyuma kwa udanganyifu najiliwana kutapika, kwa kuwa hawakulishika Neno lako na kulifuata.

¹⁵⁹Tazama, jinsi ninavyozipenda amri zako! Bwana, kwa upole wako nirudishe uzimani!

¹⁶⁰Neno lako lote zima ni la kweli, wongofu wako wa kuamua yo yote ni wa kale na kale.[#Yoh. 17:17.]

¹⁶¹Wao walionikimbiza bure ndio wakuu, lakini moyo wangu unaloliogopa sana, ni Neno lako.

¹⁶²Mimi ninayafurahia, uliyoyasema, kama mtu atokaye vitani mwenye mateka mengi.

¹⁶³Uwongo nimeuchukia, hunitapisha; Maonyo yako ndiyo, ninayoyapenda.

¹⁶⁴Ninakushangilia kila siku mara saba zote kwa ajili ya wongofu wako wa kuamulia watu.

¹⁶⁵Wayapendao Maonyo yako hupata utengemano mwingi, hawaoni lo lote litakalowakwaza.

¹⁶⁶Bwana, wokovu wako nimeutazamia, nayo maagizo yako nimeyafanya.[#1 Mose 49:18.]

¹⁶⁷Roho yangu imeyashika na kuyafuata mashuhuda yako, maana nimeyapenda sanasana.

¹⁶⁸Nimezishika amri zako na kuzifuata, nayo mashuhuda yako, kwani njia zangu zote ziko machoni pako.[#Sh. 18:22.]

¹⁶⁹Malalamiko yangu na yakufikie karibu usoni pako, Bwana! Kama ulivyosema, nipe utambuzi!

¹⁷⁰Maombo yangu na yakujie usoni pako! Kama ulivyoniambia, uniponye!

¹⁷¹Shangwe na zifurike midomoni mwangu, kwa kuwa ulinifundisha maongozi yako!

¹⁷²Ulimi wangu na uliitikie Neno lako! Kwani maagizo yako yote ni yenye wongofu.[#Sh. 1:2; Fano. 6:22.]

¹⁷³Mkono wako na uje kunisaidia mimi! Kwani amri zako ndizo, nilizozichagua.

¹⁷⁴Wokovu wako, Bwana, nimeutunukia, nayo Maonyo yako ndiyo yanayonichangamsha.[#Sh. 119:16.]

¹⁷⁵Roho yangu na ipate uzima tena, ikushangilie! Nayo maamuzi yako na yanisaidie!

¹⁷⁶Nikipotelewa na njia kama kondoo aliyepotea, mtafute mtumishi wako! Kwani sikuyasahau maagizo yako.[#Sh. 119:16; Yes. 53:6; Luk. 15:3-7.]