Kumshangilia Mungu wa kweli.

¹Haleluya! Lishangilieni Jina lake Bwana! Mlio watumishi wake Bwana, shangilieni!

²Nanyi msimamao Nyumbani mwake Bwana, nanyi mlioko nyuani penye Nyumba ya Mungu wetu,

³mshangilieni Bwana! Kwani Bwana ni mwema. Liimbieni Jina lake na kupiga mazeze! Kwani ni zuri.

⁴Kwani Bwana alimchagua Yakobo, awe wake, yeye Isiraeli awe mali zake.[#2 Mose 19:5-6; 5 Mose 7:6.]

⁵Kwani mimi ninajua, ya kuwa Bwana ni mkuu, ya kuwa Bwana wetu anaipita miungu yote kwa huo ukuu.[#Sh. 86:8.]

⁶Yote, apendezwayo nayo, Bwana huyafanya, ikiwa mbinguni au nchini, ikiwa baharini au kilindini pawapo pote.

⁷Yeye ndiye anayepandisha mawingu akiyatoa mapeoni kwa nchi, yeye ndiye anayefanya umeme na mvua pamoja, yeye ndiye anayeutoa nao upepo malimbikioni kwake.[#Yer. 10:13.]

⁸Yeye ndiye aliyewapiga kule Misri wazaliwa wa kwanza akianzia kwa watu, akimalizia kwao nyama.[#2 Mose 12:29.]

⁹Yeye ndiye aliyetuma vielekezo na vioja, vikutokee kwako, wewe Misri, vimshinde Farao na watumishi wake wote.[#Sh. 78:43-52.]

¹⁰Yeye ndiye aliyepiga wamizimu wengi, akaua nao wafalme wenye nguvu,

¹¹kama Sihoni, mfalme wa Waamori, na Ogi, mfalme wa Basani, hata nchi zote za Kanaani pamoja na wafalme wao.[#4 Mose 21:21-35.]

¹²Akazitoa nchi zao, zitwaliwe, zitwaliwe nao walio ukoo wake wa Isiraeli, ziwe fungu lao.[#Yos. 12.]

¹³Bwana Jina lako ni la kale na kale, Bwana, ukumbuko wako ni wa vizazi na vizazi.[#Sh. 102:13.]

¹⁴Kwani Bwana atawaamulia walio ukoo wake kwa kuwaonea uchungu walio watumishi wake.[#5 Mose 32:36,43.]

¹⁵Vinyago vya wamizimu ni fedha na dhahabu, mikono ya watu ndiyo iliyovifanya:

¹⁶vinywa vinavyo, lakini havisemi, macho vinayo, lakini havioni,

¹⁷masikio vinayo, lakini havisikii; wala pumzi hazimo vinywani mwao.

¹⁸Kama hivyo vilivyo, ndivyo, watakavyokuwa nao waliovifanya; nao wote pia waviegemeao.

¹⁹Mlio wa mlango wa Isiraeli, mtukuzeni Bwana! Mlio wa mlango wa Haroni, mtukuzeni Bwana![#Sh. 118:2-4.]

²⁰Mlio wa mlango wa Lawi, mtukuzeni Bwana! Mmwogopao Bwana, mtukuzeni Bwana!

²¹Bwana na atukuzwe mle Sioni, yeye akaaye Yerusalemu! Haleluya!