Kuomba wokovu kwenye watu wabaya.

¹Bwana, kwenye watu wabaya niopoe!

²nilinde, watu wenye makorofi wasinijie!

³Ndio wanaowaza mabaya mioyoni mwao, nao hufanya magomvi kila siku.

⁴Wamezinoa ndimi zao, ziwe kama za nyoka, sumu ya pili imo midomoni mwao.[#Rom. 3:13.]

⁵Niangalie, Bwana, mikono yao wasiokucha isinikamate! Nilinde, watu wenye makorofi wasinijie! Ndio wawazao, jinsi watakavyonikumba, nije kujikwaa

⁶Wenye majivuno wamenitegea matanzi na nyugwe, wakanitandikia nyavu kandokando ya njia, wakaiweka nayo mitego yao, waninase.

⁷Nikamwambia Bwana: Wewe ndiwe Mungu wangu! Bwana, zisikilize sauti za malalamiko yangu![#Sh. 22:11.]

⁸Bwana uliye Bwana wangu mwenye nguvu, u wokovu wangu, unakikingia kichwa changu siku za mapigano.

⁹Bwana, wasiokucha usiwape wanayoyatamani! Wala usiwamalizie mashauri yao mabaya, wasijivune!

¹⁰Sumu zao wanizungukao nazo njama zao, walizozisema za kupotoa, na ziwarudie wenyewe na kuwafunika![#Sh. 7:17.]

¹¹Na awanyeshee mvua ya makaa ya moto! Na awakumbe, waanguke, motoni namo mashimoni, wasiweze kabisa kuinuka tena!

¹²Mtu mwenye masingizio hatashikizwa katika nchi, mtu mwenye makorofi mabaya na yamkimbize, mpaka aangamie!

¹³Ninajua, ya kuwa Bwana atamwamulia aliye mnyonge, nayo mashauri ya wakiwa atayanyosha.

¹⁴Watakaolishukuru Jina lako kweli ndio waongofu, nao wanyokao mioyo watakaa usoni pako.