Kumlilia Mungu.

¹Bwana, sikiliza, nikikuomba, uangalie, nikikulalamikia! kwa kuwa u mwelekevu na mwongofu, na uniitikie!

²Usije kwa mtumishi wako, upate kumhukumu! Kwani kwao wote walio hai hakuna aliye mwongofu.[#Sh. 130:3; Iy. 9:2; Rom. 3:20,23.]

³Kwani adui yangu ameikimbiza roho yangu, akaniponda na kuniangusha chini akitaka kuniua, akanikalisha kwenye giza kama wao waliokufa kale.

⁴Roho yangu ikataka kuzimia kifuani mwangu, moyo wangu humu mwilini ukaguiwa na kituko.

⁵Nikazikumbuka siku zilizopita kale, nayo matendo yako yote nikayachanganya, mikono yako iliyoyafanya nikayawaza yote.[#Sh. 77:6.]

⁶Kisha nikakunyoshea mikono yangu, roho yangu ikakutunukia kama nchi kavu.[#Sh. 42:2-3; 63:2.]

⁷Bwana, niitikie upesi! Roho yangu imemalizika; usinifiche uso wako, nisije kufanana nao washukao kuzimuni![#Sh. 28:1.]

⁸Unipe kusikia asubuhi mambo ya upole wako! Kwani nimekuegemea. Nijulishe njia, nitakayoishika! Kwani nimekuinulia roho yangu.

⁹Niopoe, Bwana, ukinitoa kwao walio adui zangu! Nimekukimbilia, unifunike!

¹⁰Kwa kuwa Mungu wangu nifunze kufanya yakupendezayo! Roho yako njema iniongoze, nishike njia inyokayo![#Sh. 25:5.]

¹¹Bwana, kwa ajili ya Jina lako nirudishe uzimani! Kwa ajili ya wongofu wako nitoe katika masongano![#Sh. 23:3; 119:25.]

¹²Kwa ajili ya upole wako wamalize adui zangu! Waangamize wote waisongao roho yangu! Kwani ni mtumishi wako.[#Sh. 116:16.]