Kumtukuza Mungu.

¹Haleluya! kwa kuwa ni vema kumwimbia Mungu wetu, ni vizuri kumshangilia, nako kunapasa.[#Sh. 92:2.]

²Anayeujenga Yerusalemu ndiye Bwana, nao Waisiraeli waliotawanyika anawakusanya.

³Yeye anawaponya waliovunjika mioyo, ndiye anayewafunga vidonda vyao, walipoumizwa.[#Yes. 61:1.]

⁴Ndiye anayekiweka kiwango cha nyota, zote anaziita majina.[#Yes. 40:26.]

⁵Bwana wetu ni mkubwa mwenye nguvu nyingi, matambuzi yake hayahesabiki.

⁶Bwana ndiye anayewaegemeza watesekao, tena ndiye anayewakumba wasiomcha, waanguke chini.[#Luk. 1:52.]

⁷Mwitikieni Bwana na kumshukuru! Mwimbieni Mungu wetu na kupiga mazeze!

⁸Yeye ndiye anayeifunika mbingu kwa mawingu, naye anayezinyeshea nchi mvua ndiye yeye, ndiye anayechipuza majani huko milimani.

⁹Yeye ndiye anayewapa nyama vilaji vyao, nao makinda ya kunguru wamliliao.[#Iy. 38:41; Luk. 12:24.]

¹⁰Nguvu kubwa za farasi hazifurahii, wala hapendezwi na miguu ya mtu;

¹¹Bwana hupendezwa nao wamwogopao, nao wanaoungojea upole wake.

¹²Yerusalemu, msifu aliye Bwana! Mshangilie Mungu wako, wewe Sioni!

¹³Kwani makomeo ya malango yako anayatia nguvu, anawabariki watoto, ulio nao.

¹⁴Utengemano ndio, anaoipatia mipaka yako, anakushibisha ngano zilizo nzuri kuliko nyingine.[#Sh. 81:17.]

¹⁵Hutuma amri yake kufika katika nchi, maneno yake huendelea upesi sana.

¹⁶Hunyunyiza manyunyu ya theluji, yaking'aa kama pamba, ni wingu la baridi liyamwagalo, yamwagike kama majivu.[#Sh. 148:8; Iy. 38:22-30.]

¹⁷Mawe ya mvua huyatupa, kama ni kokotokokoto, yuko nani atakayeweza kusimama kwenye baridi hiyo?

¹⁸Lakini akisema neno tu, yanayeyuka, akituma upepo wake, yanageuka kuwa maji, yajiendee.

¹⁹Yeye ndiye anayemtangazia Yakobo maneno yake, nayo maongozi yake na maamuzi yake huwatangazia Waisiraeli.

²⁰Hivyo hakuvifanyizia wamizimu wo wote, nayo maamuzi yake hakuwajulisha. Haleluya![#5 Mose 4:7; Tume. 14:16; Rom. 3:2.]