Utukufu wake Mungu.

¹Mbingu zinausimulia utukufu wake Mungu, yaliyoko juu huyatangaza matendo ya mikono yake.[#Rom. 1:19-20.]

²Siku huambia siku mwenziwe utume huo, nao usiku huutambulisha usiku mwenziwe.

³Hakuna msemo wala maneno, sauti zao zisisikilike mumo humo.

⁴Uvumi wao ulitokea katika nchi zote, nayo maneno yao yalifika hata mapeoni kwa ulimwengu; hata jua alilionea kituo hukohuko.[#Rom. 10:18.]

⁵Nalo hutokea, kama mchumba anavyotoka chumbani mwake, hufurahia kupiga mbio njiani kama mpiga vita.

⁶Kwenye mwisho wa mbingu ndiko, linakokucha, huendelea, mpaka lichwe kwenye mwisho wake mwingine, hakuna panapojificha, lisipawakie.[#Sh. 104:19.]

⁷Maonyo yake Bwana yanayo kweli yote, hutuliza roho; ushahidi wake Bwana hutegemeka, hupambanusha wapumbavu.[#Sh. 119:50,130.]

⁸Maagizo yake Bwana hunyoka, hufurahisha mioyo, amri zake Bwana hung'aa, huangaza macho.[#Sh. 12:7; 18:31; 119:105.]

⁹Kumwogopa Bwana hutakasa, kutakuwapo kale na kale; maamuzi yake Bwana ni ya kweli, yote pamoja yameongoka.

¹⁰Hayo hutunukiwa kuliko dhahabu, hupita hata dhahabu nyingi zilizong'azwa; tena ni matamu kuliko asali, hupita nao ute wa masega yenye asali.[#Sh. 119:72.]

¹¹Kisha mtumwa wako huonywa nayo, kuyashika huleta mapato mengi.

¹²Yuko nani ajuaye po pote, alipopotelewa? Uning'aze, yaniondokee nayo makosa yajifichayo![#Iy. 9:3; Sh. 130:3.]

¹³Nako kwao wanaokusahau umtoweshe mtumwa wako, wasinitawale! Ndivyo, nitakavyokuwa pasipo kosa, nipate kutakata, yakiniondokea maovu, yaliyokuwa mengi.[#Sh. 18:24.]

¹⁴Maneno ya kinywa changu sharti yakupendeze, nayo mawazo ya moyo wangu sharti yawe wazi mbele yako, Bwana, wewe ndiwe mwamba wangu na mkombozi wangu.