Kuomba wokovu pamoja na kuutukuza.

¹Wewe Bwana ninakuita, u mwamba wangu, usininyamazie na kuwa kimya, nisije kufanana nao washukao kuzimuni![#Sh. 143:7.]

²Zisikie sauti za malalamiko yangu, ninapokulilia nikikuinulia mikono yangu pale Patakatifu Penyewe palipo pako![#1 Fal. 8:30; Omb. 3:41.]

³Usinipokonye pamoja nao wasiokucha, wala pamoja nao wafanyao maovu! Wao husema polepole na wenzao, lakini mioyoni mwao yamo mabaya.[#Sh. 26:9.]

⁴Uwape yazipasayo kazi zao na ubaya wa matendo yao, mishahara yao ipatane nayo, mikono yao yatendayo! Ndivyo, utakavyowarudishia yaliyofanyizwa nao!

⁵Kwani kazi zake Bwana hawazitambui, wala mikono yake iyatendayo! yawayo yote, kwa hiyo atawavunja, asiwajenge tena.[#Yes. 5:12.]

⁶Apasaye kutukuzwa ni Bwana, kwani huzisikia sauti zao malalamiko yangu.

⁷Bwana ni nguvu yangu na ngao yangu; moyo wangu ulipomwegemea, nikapata kusaidiwa. Moyo wangu ukamshangilia, nikamwimbia nyimbo za kumshukuru.[#Sh. 18:2-3.]

⁸Bwana ni nguvu yao, walio wake, tena ni ngome imwokoayo aliyempaka mafuta.

⁹Waokoe walio ukoo wako na kuwabariki watakaopata fungu kwako! Wachunge na kuwavumilia kale na kale![#Sh. 29:11.]