Maombo ya mtu amtegemeaye Bwana hata siku za mahangaiko.

¹Wewe Bwana, nimekukimbilia, sitatwezeka kale na kale. Kwa kuwa mwenye wongofu na uniponye!

²Nitegee sikio lako, unisaidie upesi! Niwie mwamba wenye nguvu na nyumba yenye boma! Ndivyo, utakavyopata kuniokoa.[#Sh. 18:3.]

³Kwani mwamba wangu na boma langu ndiwe wewe, kwa ajili ya Jina lako utaniongoza, unipeleke.[#Sh. 23:3.]

⁴Unitoe katika tanzi, walilonitegea! Kwani aliye nguvu yangu ndiwe wewe.[#Sh. 25:15.]

⁵Roho yangu naiweka mikononi mwako; Bwana uliye Mungu wa kweli, umenikomboa.[#Luk. 23:46; Tume. 7:59.]

⁶Nawachukia waangaliao mizimu iliyo ya uwongo tu, mimi ninayemwegemea, ndiye Bwana.

⁷Nitashangilia na kuufurahia upole wako, kwa kuwa umeutazama ukiwa wangu, ukayatambua nayo masongano ya roho yangu.

⁸Hukunitia mikononi mwao walio adui zangu, miguu yangu huipatia papana pa kusimamia.[#Sh. 18:37.]

⁹Niwie mpole, Bwana! Kwani nimesongeka, macho yangu yamenyauka kwa uchungu, nayo roho vilevile pamoja na mwili.[#Sh. 6:8.]

¹⁰Kwani siku zangu zimeishia kwa masikitiko, miaka yangu nayo kwa kupiga kite, nguvu yangu imepondeka kwa manza, nilizozikora, hata mifupa yangu haina kiini.

¹¹Nikawa wa kufyozwa tu kwao wanisongao, hata kwa wenzangu wa kukaa nao ni vivyo hivyo, nao rafiki zangu ninawatia woga, wanionao njiani hunikimbia.[#Sh. 69:11-13.]

¹²Nimesahauliwa mioyoni mwao kama mfu, nikawa kama chombo kilichovunjika.

¹³Nikasikia wengi, wakinong'onezana: Pande zote pia anastukwia tu; wakanilia njama wote pamoja, wakawaza, ndivyo waone njia ya kunitoa roho.[#Yer. 20:10; 46:5; Mat. 26:3-4.]

¹⁴Lakini mimi ninayemwegemea, ndiye Bwana, Mungu wangu ndiwe wewe! Hii naungama.

¹⁵Mikononi mwako ndimo, siku zangu za kuwapo zilimo; niponye na kunitoa mikononi mwao adui zangu wanikimbizao![#Sh. 139:16.]

¹⁶Uangaze uso wako, mtumishi wako auone! Kwa upole wako na uniokoe![#Sh. 80:4; 4 Mose 6:25.]

¹⁷Bwana, usiniache, nisije kutwezwa, kwani nikakulilia; sharti watwezwe wao wasiokucha, na waje kuzimuni kuyamazia huko!

¹⁸Midomo yenye uwongo sharti ifumbwe kuwa kimya, kwani mwongofu wamemtolea meneno ya kumkorofisha, kwa majivuno yao wakambeza.

¹⁹Ninayastaajabu mema yako, jinsi yalivyo mengi, umeyalimbikia wao wakuogopao, nao wakukimbiliao huwapa machoni pa watu.

²⁰Mafichoni kwa uso wako unawaficha, watu wakiwatolea ukali; ukawafunika chumbani ndani, ndimi zao zikiwagombeza.[#Sh. 27:5.]

²¹Bwana na atukuzwe! Kwani amenistaajabisha, akaniweka mjini mwenye nguvu kwa upole wake.[#Sh. 17:7.]

²²Nami kwa woga wangu nilikua nimesema: Nimetupwa, niondoke penye macho yako, yasinione tena. Lakini malalamiko yangu umeyasikia kweli hapo, nilipokulilia, unisaidie.[#Sh. 116:11.]

²³Mpendeni Bwana, ninyi yote mmchao! Bwana huwalinda wamtegemeao. Lakini wafanyao majivuno huwalipisha, asisaze hata kidogo.

²⁴Jipeni mioyo, mpate nguvu, nyote mnaomngojea yeye Bwana![#Sh. 27:14.]