Kuutukuza wema na uwezo wake Mungu.

¹Pigeni vigelegele, ninyi waongofu, kwa kuwa naye Bwana! Kumtukuza na kumsifu kunawapasa wanyokao mioyo.[#Sh. 32:11.]

²Mshukuruni Bwana na kupiga mazeze! Mpigieni nayo mapango yenye nyuzi kumi![#Sh. 92:4.]

³Mwimbieni wimbo mpya na kupiga shangwe zilizo nzuri mkizipatanisha nayo marimba![#Sh. 40:4; 96:1; 98:1; Ef. 5:19; Ufu. 5:9.]

⁴Kwani Bwana ayasemayo hunyoka, nayo yote ayafanyayo hutimia kweli.

⁵Hupenda mashauri yaongokayo, nchi imejaa magawio yake Bwana.

⁶Kwa neno lake Bwana mbingu zilifanyika, nayo majeshi yao yote yakatokea, alipopuzia na kinywa chake.[#1 Mose 1:6,14.]

⁷Maji ya bahari huyakusanya, kama yamo chunguni, navyo vilindi huviweka mahali pao.[#Sh. 104:9.]

⁸Sharti zimwogope Bwana nchi zote, nao wote wakaao ulimwenguni sharti wamche.

⁹Kwani Yeye ayasemayo mara huwapo; Yeye ayaagizayo hutokea papo hapo.

¹⁰Bwana huyavunja mashauri yao wamizimu, huyatengua mawazo yao makabila ya watu.

¹¹Shauri lake Bwana husimama kale na kale, mawazo ya moyo wake hutimilia vizazi kwa vizazi.

¹²Wenye shangwe ndio, Bwana aliowawia Mungu, nalo kabila la watu, aliowachagua, wawe fungu lake.[#5 Mose 33:29.]

¹³Bwana huchungulia toka mbinguni, huwatazama wote pia walio wana wa watu.

¹⁴Kwenye kao lake, alikotua, huwaangalia wote wakaao nchini.

¹⁵Yeye ndiye aliyeiumba mioyo yao wote, naye ndiwe anayeyapambanua matendo yao yote.

¹⁶Hakuna mfalme aokolewaye na nguvu zake nyingi, wala fundi wa vita aponaye kwa uwezo wake mwingi.[#1 Sam. 17.]

¹⁷Farasi nao ni wa bure, hawashindi, nguvu zao nyingi haziponyi mtu.[#Sh. 20:8.]

¹⁸Utaliona jicho la Bwana, likiwatazama wamwogopao, ndio waingojeao huruma yake,[#Sh. 34:16,18.]

¹⁹aziokoe roho zao katika kufa, hata siku za njaa awatunze.[#Sh. 34:10-11.]

²⁰Roho zetu zinamngoja yeye Bwana, ndiye msaada wetu na ngao yetu.[#Sh. 3:4.]

²¹Kwa hiyo mioyo yetu inamfurahia, kwani Jina lake takatifu tunaliegemea.

²²Wema wako, Bwana, utukalie! Hivyo ndivyo, tunavyovingojea toka kwako.