Maombo ya kujutia siku za magonjwa na za maumivu ya moyo.

¹Bwana, usinipatilize kwa ukali wako, wala kwa machafuko yako yenye moto usinichapue!

²Kwani mishale yako imenichoma, nao mkono wako umenilemea.[#Iy. 6:4; Sh. 32:4.]

³Hakuna kilicho kizima mwilini mwangu kwa ukali wako ulionitokea. Wala fupa lisilopatwa na ugonjwa haliko kabisa kwa ajili yao hayo, niliyoyakosa.[#Sh. 51:10.]

⁴Manza, nilizozikora, zinanirudia, nizitwike kichwani, lakini kwa kuwa mzigo upitao nguvu zangu zinanilemea.[#Omb. 1:14.]

⁵Madonda yangu yananuka kwa usaha mwingi kwa hivyo, nilivyokuwa mwenye upumbavu.

⁶Kwa kupindika sanasana nimepotoka, mchana kutwa ninatembea kwa kusikitika.

⁷Kwani viuno vyangu vinazidi kuchomwa na moto wa machungu, hakuna kilicho kizima mwilini mwangu.

⁸Nimegeuka kuwa mwembamba kwa kupondeka sanasana, moyo ukizidi kunipiga mno, ninalia.

⁹Bwana, unayajua yote, niyatakayo, hata ninavyopiga kite, havikujificha kwako.

¹⁰Moyo wangu unatetemeka kwa kutokwa na nguvu, nilizokuwa nazo, nao mwanga wa macho yangu haumo tena mwangu.

¹¹Wapenzi wangu na rafiki zangu husimama mbali kwa kuviona hivyo, ninavyopatilizwa; nao walio ndugu zangu husimama mbali.[#Sh. 31:12; Iy. 19:14-19.]

¹²Wanaonitakia roho yangu wananitegea, wanaotafuta, watakavyoniangamiza vibaya, wanasema mapotovu, wananong'onezana madanganyifu mchana kutwa.

¹³Lakini mimi niko kwao kama kiziwi, nisiyasikie, au kama bubu asiyefumbua kinywa chake; ndivyo, nilivyo kwao.[#Sh. 39:3.]

¹⁴Kweli ninafanana na mtu asiyesikia, asiyeweza kubisha na kinywa chake.

¹⁵Kwani wewe Bwana ndiwe, niliyekungojea; wewe utawajibu, Bwana Mungu wangu.

¹⁶Kwani nimesema: hawatafurahi kamwe na kunicheka; kama mguu wangu ungejikwaa, wangejivuna na kunibeza.

¹⁷Kwani kuvunjika kuko karibu kwangu mimi, maumivu yangu hayakomi hata kidogo.

¹⁸Manza, nilizozikora, ninaziungama, kwa kuyasikitikia hayo, niliyoyakosa.[#Sh. 32:5.]

¹⁹Lakini adui zangu ni wenye uzima, nguvu za miili wanazo, nao wanaonichukia bure ndio wengi.

²⁰Mema, niliyowafanyizia, wanayalipa na kunifanyizia mabaya wananipingia, kwa sababu ninayakimbilia yaliyo mema.[#Sh. 35:12.]

²¹Usiniache, wewe Bwana! Mungu wangu, usinikalie mbali!

²²Piga mbio, unisaidie, wewe Bwana, wokovu wangu!