Kilio cha mtu apatwaye na majaribu.

¹Nilisema: Nitaziangalia njia zangu, nisiukoseshe ulimi wangu; nacho kinywa changu nitakiangalia na kukifumba, asiyemcha Mungu akingali yuko mbele yangu.[#1 Mambo 25:1,3.]

²Nikanyamaza kimya, sikusema neno; lakini hakuna chema, nilichokiona, maumivu yakazidi kunila.[#Sh. 38:14.]

³Moto ukauchoma moyo wangu kifuani mwangu, nao huo moto ukawaka na nguvu, nilipoyawaza hayo; ndipo, nilipoufungua ulimi, na useme:

⁴*Bwana, nijulishe mwisho utakaonipata! Niujue nao mpaka wa siku zangu, ziliokatiwa! Tena ni mbali gani kuufikia! Ya kuwa mimi ni mpitaji tu, na niyajue![#Sh. 90:12; Iy. 14:5.]

⁵Tazama, siku zangu, ulizonipa, ni zenye upana kama wa kiganja tu; mbele yako nipo kama mtu asiyekuwapo. Kweli kila mtu, ijapo awe mwenye nguvu, ni mvuke tu.[#Sh. 90:5.]

⁶Mtu hujiendea kama kivuli, mambo ya ovyoovyo huyapigia makelele, hamjui atakayezipata mali zake, lakini huzilimbika.[#Mbiu. 2:18,21; Luk. 12:18-20.]

⁷Sasa ningojee nini, Bwana wangu? Ninakungojea wewe peke yako.

⁸Katika mapotovu yangu yote niopoe, lakini usinitoe kuwa wa kusimangwa nao wapumbavu!

⁹Nitanyamaza tu, nisikifumbue kinywa changu, kwani wewe ndiwe uliyeyafanya.[#2 Sam. 16:10.]

¹⁰Liondoe patilizo lako, linitoke! Kwa mapigo ya mkono wako mimi nimemalizika.

¹¹Ukimtisha mtu na kumchapua kwa ajili ya manza, unautowesha uzuri wake, kama nondo anavyofanya. Kweli kila mtu aliopo ni mvuke tu.[#Sh. 39:6.]

¹²Bwana, yasikie maombo yangu! Vilio vyangu sharti vifike masikioni mwako! Nayo machozi yangu usiyanyamazie! Kwani mimi ni mgeni tu apangaye kwako, kama baba zangu wote walivyokuwa.[#Sh. 119:19; 3 Mose 25:23; 1 Petr. 2:11; Ebr. 11:13.]

¹³Fumba macho, yasinione, uso uning'ae, nikingali sijaenda bado, nisiwepo tena!*[#Iy. 10:20.]