Kumshukuru na kumwomba Mungu.

¹Nimekuwa nimemngojea yeye Bwana, naye akaniinamia, akakisikiliza kilio changu.

²Akanitoa katika mwina uangamizao, nako kwenye matope yazamishayo, akaisimamisha miguu yangu juu mwambani, nao mwendo wangu akaushupaza.

³Akanipa kinywani mwangu wimbo mpya, nao ni wa kumshangilia Mungu wetu. Wengi wataviona na kuogopa, kisha nao watamwegemea huyu Bwana.[#Sh. 33:3.]

⁴Mwenye shangwe ni mtu amtumiaye Bwana kuwa egemeo lake, asiyewageukia wajivunao, wala wao wanaodanganya na kutumikia uwongo!

⁵Bwana Mungu wangu, uliyoyafanya wewe, ni mengi, ni mataajabu yako na mawazo yako yaliyotutokea; hakuna anayefanana nawe wewe. Ninataka kuyatangaza na kuyasimulia, ijapo yawe mengi, yasihesabike.[#Sh. 139:17-18.]

⁶Ng'ombe na vyakula vya tambiko hakupendezwa navyo, lakini umenizibua masikio yangu; ng'ombe za tambiko zinazoteketezwa nzima navyo vipaji vya tambiko vya kulipa makosa hukuvitaka.[#Sh. 51:18; Yes. 50:5; Ebr. 10:5-10.]

⁷Ndipo, niliposema: tazama, ninakuja! Mambo yangu yamekwisha kuandikwa katika kitabu cha kuzingwa.[#Sh. 50:8-13.]

⁸Kuyafanya, uyatakayo wewe, Mungu wangu, kunanipendeza, nayo Maonyo yako yamo ndani moyoni mwangu,

⁹nikatangaza yaongokayo, wengi walipokusanyika; itazame midomo yangu, sikuifunga, wewe ulio Bwana unavijua.[#Sh. 22:23,26.]

¹⁰Wongofu wako sikuufunika ndani moyoni mwangu, ila welekevu wako na wokovu wako nikausimulia, wala sikuuficha wema wako na ukweli wako, wengi walipokusanyika.

¹¹Huruma zako, wewe Bwana, usininyime, wema wako na ukweli wako unilinde siku zote!

¹²Kwani makosa yasiyohesabika yalinizunguka, manza, nilizozikora, zikanirudia, nisiweze kuziona zote, ni nyingi sana kuliko nywele za kichwani pangu; ndipo, moyo wangu ulipojiendea, ukanipotelea.

¹³Na vikupendeze, Bwana, kuniopoa! Bwana, piga mbio, unisaidie!

¹⁴Sharti wapatwe na soni kwa kutwezwa wao wote pamoja walioitafuta roho yangu, waiangamize! Sharti warudishwe nyuma, nyuso ziwaive kwa soni waliopendezwa na mabaya yaliyonipata mimi.[#Sh. 6:10.]

¹⁵Sharti waustukie ukiwa wao na kuona soni wale walioniambia: Weye! Weye![#Sh. 35:21,25.]

¹⁶Sharti wachangamke na kufurahiwa wote wakutafutao! Waupendao wokovu wako waseme pasipo kukoma: Mkuu ni Bwana!

¹⁷Ijapo, niwe mnyonge na mkiwa, Bwana hunikumbuka; msaada wangu na mwokozi wangu ndiwe wewe, Bwana; Mungu wangu, usinikawilie![#Sh. 109:22.]