Kilio cha mgonjwa.

¹Mwenye shangwe ni mtu atunzaye mnyonge. Naye atakapopatwa na kibaya, Bwana atamwokoa.[#Fano. 19:17; Mat. 5:7.]

²Bwana atamlinda, atampa uzima, aone mema nchini; hutamtoa, adui zake wampate kwa kumtamani.

³Akilala kitandani kwa kuugua, Bwana atamshikiza, amwuguze na kumtandikia vema katika ugonjwa wake wote.

⁴Mimi nasema: Bwana, nihurumie! Iponye roho yangu! Kwani nimekukosea.[#Sh. 6:3.]

⁵Adui zangu wananisema vibaya kwa kwamba: Itakuwa lini, atakapokufa, jina lake liangamie?

⁶Kama mtu anakuja kunikagua, hujisemea ovyo tu, lakini moyo wake huokota ayaonayo kuwa mapotovu, kisha anatoka nje, ayasema.

⁷Wote wanichukiao hunong'onezana pamoja, watakayonifanyizia, ni mabaya tu, wanayoniwazia kwa kwamba:

⁸Jambo lisilopona limemkaza, hivyo, anavyolala, hatainuka tena.

⁹Hata mwenzangu wa uchale, niliyemwegemea kwa moyo, naye anayeula mkate wangu, hunipiga mateke.[#Sh. 55:14; Yoh. 13:18; Tume. 1:16.]

¹⁰Lakini wewe Bwana, nihurumie na kuniinua, nipate kuwalipiza!

¹¹Hapo ndipo, nitakapotambua, ya kuwa umependezwa nami, adui yangu asipoweza tena kunipigia yowe.

¹²Kwa hivyo, mimi ninavyokucha kwa moyo wote, unanishikiza, ukanipa kusimama usoni pako kale na kale.

¹³Bwana Mungu wa Isiraeli, na atukuzwe kama huko kale, vivyo nazo siku zitakazokuwa kale na kale! Amin. Amin.[#Sh. 72:18; 89:53; 106:48; 150:6.]