Kilio cha walipotolewa.

¹Mungu, tulisikia na masikio yetu, baba zetu wakituambia: Ulitenda tendo siku zao, hata siku za kale.[#5 Mose 6:20-25.]

²Wewe kwa mkono wako uliwafukuza wamizimu, ukawaweka pao, ukaangamiza makabila ya watu, upate pa kuwaenezea.

³Kwani nchi hawakuitwaa kwa nguvu za panga zao, wala mikono yao siyo iliyowashindisha, ila mkono wako wa kuume na mwanga wa uso wako ndio uliovifanya kwa kupendezwa nao.

⁴Wewe, Mungu, ndiwe uliye mfalme wangu; uagize wokovu, umjie Yakobo![#Sh. 74:12.]

⁵Kwa nguvu zako tutawakumba watusongao, waanguke; kwa nguvu za Jina lako tutawapiga mateke watuinukiao.

⁶Kwani siutegemei upindi wangu, kweli sio, ninaoujetea, wala upanga wangu sio uniokoao.[#Sh. 20:8.]

⁷Kwani wewe ulituokoa mikononi mwao watusongao, nao watuchukiao uliwatia soni.

⁸Mungu tunamwimbia siku zote, Jina lako tunalishukuru kale na kale.

⁹Na sasa umetutupa na kututia soni, maana hukutoka pamoja navyo vikosi vyetu,

¹⁰Ukaturudisha nyuma mbele yao watusongao, nao watuchukiao wakajipatia mateka;

¹¹ukatutoa, kama tu kondoo, tuwe chakula, ukatutawanya kwao walio wamizimu.

¹²Walio ukoo wako umewauza kwa mali zisizo mali, lakini kwa hayo malipo yao hakuna ulichokipata.

¹³Ukatutia soni kwao, tuliokaa nao, tukafyozwa na kusimangwa nao waliotuzunguka.[#Sh. 79:4; 1 Fal. 9:7.]

¹⁴Ukatuweka kuwa kama fumbo kwa wamizimu, makabila ya watu hututingishia vichwa vyao.

¹⁵Siku zote hayo mabezo yapo machoni pangu; naufunika uso wangu kwa kuona soni

¹⁶nikizisikia sauti zao wanifyozao pamoja na kunitukana, nikimwona adui anitakaye, apate kujilipiza.

¹⁷Haya yote yametupata, lakini hatukukusahau, wala hatukulivunja Agano lako,

¹⁸wala mioyo yetu haikurudi nyuma, wala miguu haikuondoka katika njia yako.

¹⁹Nako, mbwa wa mwitu wanakokaa, ukatuponda, ukatufunika na giza kama la kufa.

²⁰Kama tungekuwa tumelisahau Jina la Mungu, au kama tungekuwa tumemwinulia mungu mgeni mikono yetu,

²¹Mungu asingeyaumbua mambo hayo? Kwani yeye huyajua nayo mawazo yajifichayo moyoni.[#Sh. 7:10.]

²²Kumbe ni kwa ajili yako wewe, tukiuawa kila siku, tukihesabiwa kuwa kama kondoo wa kuchinjwa tu![#Rom. 8:36.]

²³Amka! Sababu gani umelala usingizi, Bwana wangu? Inuka! Usinitupe kale na kale![#Sh. 35:23.]

²⁴Sababu gani unauficha uso wako? Umeyasahau maumivu yetu yatusongayo?[#Sh. 10:1.]

²⁵Kweli roho zetu zimeinamishwa kulala uvumbini, nayo miili yetu imegandamiana na mchanga wa chini.

²⁶Mwenye msaada, inuka, uje kwetu! Kwa ajili ya huruma yako tukomboe!