Wimbo wa ndoa ya mfalme.

¹Moyo wangu umefurika, utunge maneno mema; kwa kumfanyizia mfalme kazi mimi ninayesema. Ulimi wangu ni kalamu ya fundi ajuaye kuandika.[#Sh. 69:1.]

²Wewe unawashinda wana wa watu kwa uzuri wako. Utu umeenezwa midomoni mwako, kwa hiyo Mungu atakubariki kale na kale.[#Imbo. 5:10-16.]

³Funga upanga wako kiunoni, wewe mshindaji! Maana ndio pambo lako na urembo wako.

⁴Hilo pambo lako na likupe kumaliza kazi! Gombea tu mambo ya kweli na ya upole nayo ya wongofu! Ndivyo, kuume kwako kutakavyokufundisha matendo yatishayo.[#Sh. 72:4.]

⁵Mishale yako nayo ni mikali; kwa hiyo makabila ya watu yatakuangukia chini, kwani huichoma mioyo yao adui za mfalme.

⁶Mungu, kiti chako cha kifalme kiko kale na kale pasipo mwisho, nayo fimbo ya ufalme wako ndiyo fimbo inyoshayo mambo ya watu.[#2 Sam. 7:13; Yes. 9:6-7; Ebr. 1:8-9.]

⁷Ulipenda wongofu, ukachukia upotovu. Kwa hiyo Mungu aliye Mungu wako alikupaka mafuta, haya mafuta ni ya kufurahisha kuliko yale ya wenzio.

⁸Mavazi yako yote hunukia manemane na udi, hata marashi, kwenye majumba yaliyopambwa na pembe mazeze yanakufurahisha.[#Amo. 3:15.]

⁹Humo mna watoto wa kike wa kifalme, uliowapamba vizuri, naye mkeo wa kifalme yuko kuumeni kwako, huwa mwenye mapambo ya dhahabu ya Ofiri.

¹⁰Sikia mwanangu, uviangalie! Niinamishie sikio lako! Sharti uusahau ukoo wako na nyumba ya baba yako![#1 Mose 2:24.]

¹¹Itakapokuwa, mfalme akutake kwa uzuri wako, basi, kwa kuwa yeye ni bwana wako, sharti umwangukie!

¹²Wanawake wa Tiro watakutokea usoni, wakupe matunzo, nao wenye mali wa ukoo huu watajipendekeza kwako.

¹³Mwana wa kike wa mfalme yumo nyumbani mlimo na utukufu, nyuzi za dhahabu tu ndizo zilizoyafuma mavazi yake;

¹⁴akivaa nguo za rangi nzuri anapelekwa kwa mfalme, nao watoto wa kike wenzake wamfuatao nyuma wanapelekwa kwako.

¹⁵Katikati ya wapiga shangwe na vigelegele watasindikizwa, waje jumbani mwa mfalme kuwa humo.

¹⁶Hapo, baba zako walipokuwa, watakuwapo wana wako wa kiume, utawaweka kuwa wakuu katika nchi zote.

¹⁷Nitalikumbusha Jina lako kwa vizazi vyote vitakavyokuwa, kwa sababu hii makabila yote ya watu watakushukuru kale na kale,