Matukuzo ya Sioni.

¹Bwana ni mkuu na mtukufu sana, mjini mwa Mungu wetu umo mlima wenye Patakatifu pake.[#Sh. 46:5.]

²Ni vizuri kuvitazama, unavyoinuka huo mlima wa Sioni, nchi yote nzima huufurahia; upande wa kaskazini uko mji wa mfalme mkuu.[#Omb. 2:15; Mat. 5:35.]

³Katika majumba yake mazuri Mungu amejulikana, ya kuwa ni ngome yenye nguvu.

⁴Tukivitazama, ni hivyo: wafalme walikula njama, wote pamoja wakaondoka kwao kupiga vita.[#2 Fal. 19.]

⁵Hapo walipouona, mara wakastuka, wakaingiwa na woga, wakakimbia.

⁶Papo hapo utetemeko ukawashika, ni uchungu kama wa mwanamke atakaye kuzaa.

⁷Kwa nguvu ya upepo wa kimbunga ukazivunja nazo merikebu zao za kwenda Tarsisi.

⁸Kama tulivyosikia, tukaviona vivyo hivyo katika mji wa Bwana Mwenye vikosi, katika mji wake Mungu wetu: Mungu ameushikiza, ukae kale na kale.

⁹Mungu, tunazikumbuka huruma zako Jumbani mwako.

¹⁰Kama Jina lako, Mungu, lilivyo kuu, vivyo hivyo nayo matukuzo yako yamefika mapeoni kwa nchi, mkono wako wa kuume umejaa wongofu.[#Mal. 1:11.]

¹¹Mlima wa Sioni huufurahia, wana wa kike wa Yuda huyapigia vigelegele maamuzi yako.

¹²Uzungukeni mji wa Sioni na kuuzingia wote, mpate kuihesabu minara yake!

¹³Liangalieni boma lake, msilisahau mioyoni mwenu! Napo penye majumba yake piteni po pote, kusudi mvisimulie kizazi kijao,

¹⁴ya kuwa huyu Mungu ni Mungu wetu kale na kale pasipo mwisho. Yeye hutuongoza, mpaka tutakapokufa.[#Yes. 25:9.]