Mema yao wasiomcha Mungu hayakawi kuangamia.

¹Makabila yote ya watu, yasikilizeni! Nyote mkaao ulimwenguni, yategeeni masikio,

²nyote mlio watuwatu tu, nanyi mlio mabwana! Ninyi mlio wenye mali nanyi maskini, yote pamoja!

³Kinywa changu kitasema yenye werevu wa kweli, nayo mawazo ya moyo wangu ni ya utambuzi.

⁴Nitaliinamisha sikio langu, lisikie mfano, nitalifumbua fumbo langu na kupiga zeze.[#Sh. 78:2.]

⁵Siku zikiwa mbaya, niogopeje, watakao kunikorofisha kinyumanyuma wakinizinga?

⁶Wao wanauegemea uwezo wao na kujivunia mali zao zilizo nyingi.

⁷Hakuna awezaye kumkomboa ndugu yake, hawezi kumpa Mungu mali za ukombozi.

⁸Kwani mali za kukomboa roho ya mtu hazilipiki, zinashindakale na kale, hazipatikani.[#Mat. 16:26; 20:28.]

⁹Ijapo mtu akae sanasana, asilione kaburi,

¹⁰lakini hana budi kuliona, maana walio werevu wa kweli hufa, wajinga nao wasiojua kitu huangamia pamoja nao, nazo mali, walizozipata, huziachia wengine.[#Mbiu. 2:16; 6:2.]

¹¹Makaburi yao ni nyumba zao za kukaa kale na kale, ndivyo makao yao ya vizazi na vizazi, hata ikiwa wameita nchi nzima kwa majina yao.

¹²Hivyo mtu hakai na utukufu wake, hufananishwa na nyama wanaoishilizwa.[#Mbiu. 3:19; 2 Petr. 2:12.]

¹³Ndiko, zinakokomea njia zao waliojiegemea wenyewe, tena wanafuatwa nao waliopendezwa na maneno yao.

¹⁴Kama kondoo wanashurutizwa kwenda kuzimuni, mwenye kuwachunga ndiye kifo. Wanyokao mioyo watawatawala hapo patakapokucha; ndipo, ubishi wao utakapoishia, watakapokaa kuzimuni.

¹⁵Kweli Mungu ataikomboa roho yangu katika nguvu ya kuzimuni, naye atakayenipokea ndiye yeye.[#Hos. 13:14.]

¹⁶Mtu akipata mali nyingi, usihangaike, ijapo, utukufu wa nyumba yake aukuze kuwa mwingi![#Iy. 21:7-15.]

¹⁷Kwani katika hayo yote hayamo, atakayochukua atakapokufa, utukufu wake hautamfuata kwenda kuzimuni![#Mbiu. 5:14-15; 1 Tim. 6:7.]

¹⁸Akingali yupo mzima hujituliza mwenyewe, wewe nawe watu watakusifu, ukivila vyako vyenye urembo.[#Luk. 12:19; 16:19-31.]

¹⁹Hivyo watu huenda kwenye kizazi cha baba zao, kusiko na mwanga kale na kale wa kuwamulikia.

²⁰Mtu akiwa na utukufu wake, asiutambue, atafananishwa na nyama wanaoishilizwa.[#Sh. 49:13.]