Utulivu wa moyo katika mateso.

¹Kwa kuwa wako watu wanaonifokea, nihurumie Mungu! Siku zote wananigombeza na kunitesa.[#1 Sam. 21:10-15.]

²Hao wanaonisonga wananifokea siku zote, kwani ni wengi wanaonigombeza kwa majivuno tu.

³Siku, ninaposhikwa na woga, ninakuegemea wewe.

⁴Kwa kuwa naye Mungu na nilitukuze Neno lake, kwa kumwegemea Mungu sitaogopa kamwe; wenye miili ya kimtu wanifanyieje?[#Sh. 27:1; 118:6; Yes. 12:2; 51:12; Mat. 10:28; Ebr. 13:6.]

⁵Siku zote huyabishia maneno yangu, waniumize, kwa mawazo yao yote hunitafutia mabaya.

⁶Wao hujikusanya, waniotee na kupanyatia, nyayo zangu zilipo, kwa sababu wanangojea kuipata roho yangu.

⁷Kwa ajili ya mapotovu yao hawataona wokovu, watu walio hivyo uwachafukie, Mungu, na kuwakumba![#Sh. 55:24.]

⁸Siku za kutangatanga kwangu umezihesabu wewe, machozi yangu nayo yakusanye kwako katika kichupa! Najua, yamo katika kitabu chako, umeyaandika.

⁹Hapo, watakaporudi nyuma adui zangu, itakuwa siku ile, nitakapokuitia; maana hili ninalijua, ya kuwa Mungu yuko upande wangu.

¹⁰Kwa kuwa naye Mungu na nilitukuze Neno lake, kwa kuwa naye Bwana na nilitukuze Neno lake.

¹¹Kwa kumwegemea Mungu sitaogopa kamwe; walio watuwatu tu wanifanyieje?

¹²Niliyokuapia, Mungu, nitakulipa, nikushukuru.

¹³Kwani umeiopoa roho yangu katika kufa; kweli, hata miguu yangu unaiangalia, isijikwae, ipate kuendelea machoni pa Mungu penye mwanga wao wenye uzima.[#Sh. 116:8; Iy. 33:30.]