Kukemea waamuzi wasio wa kweli.

¹Ni vya kweli hivyo, mnavyohukumu, ninyi wakuu? nayo maamuzi yenu yananyoka, ninyi wana wa watu?[#Sh. 82.]

²Sivyo! Kwani mioyoni mwenu yamo mapotovu; ndiyo mnayoyafanya, nayo makorofi ya mikono yenu mnayaendesha katika nchi.

³Wasiomcha Mungu hukataa kutii tangu kuzaliwa kwao, wasemao uwongo hupotea hivyo, walivyozaliwa.

⁴Sumu inayofanana na sumu ya nyoka wao wanayo, wafanana na pili asiyesikia kwa kuyaziba masikio,

⁵ni yule asiyesikiliza sauti ya mganga, ijapo ajue sana kufinga nyoka kwa huo uganga.[#Mbiu. 10:11.]

⁶Mungu yavunje meno yao vinywani mwao! Nayo magego ya wana wa simba yang'oe, Bwana!

⁷Sharti wakauke kama maji yanayojiendea tu, mishale yao sharti iwe, kama haina chembe, watakapoielekeza!

⁸Wawe kama kovya linalokwenda na kuyeyuka, au kama mimba ya mwanamke iharibikayo pasipo kuona jua.

⁹Hivyo nayo miiba yenu ikiwa haijakomaa penye miti yao, ataipeperusha kwa ukali wa moto, ijapo iwe mibichi!

¹⁰Mwongofu atafurahi akiyaona malipizi hayo, ataiogesha miguu yake katika damu yake asiyemcha Mungu.

¹¹Ndipo, watu watakaposema: kumbe mwongofu hupata! Kumbe yuko Mungu ahukumuye katika nchi![#Sh. 7:9.]