Kuomba kwa mtu aliyeshindwa vitani.

¹Mungu, umetutupa na kututapanya; kweli ulikuwa umetuchafukia, lakini utugeukie![#2 Sam. 8:3,13; 10:13,18.]

²Umeitetemesha nchi na kuipasua, sasa ziponye nyufa zake, maana imetingishika.

³Walio ukoo wako umewaonea magumu, ukatunywesha mvinyo za kutupepesusha.[#Yes. 51:17,22.]

⁴Lakini wao wakuogopao umewapa bendera ya kuinuliana, wapate kuyagombea yaliyo ya kweli.[#Sh. 20:6.]

⁵Kusudi wao uwapendao wapate kuopoka, mkono wako wa kuume uwaokoe, ukituitikia!

⁶Mungu alisema hapo Patakatifu pake: Nikiigawanya nchi ya Sikemu nitapiga vigelegele; ndipo, nitakapolipima nalo bonde la Sukoti.

⁷Gileadi ni yangu, Manase ni yangu, Efuraimu ni kingio la kichwa changu, Yuda ni bakora yangu ya kifalme.[#1 Mose 49:10.]

⁸Moabu ni bakuli langu la kunawia, Edomu ndiko, nitakakovitupia viatu vyangu, nchi ya Wafilisti itanishangilia.

⁹Yuko nani atakayenipeleka mjini mwenye maboma? Yuko nani atakayeniongoza mpaka Edomu?

¹⁰Si wewe Mungu uliyenitupa, ukakataa kwenda vitani na vikosi vyetu?

¹¹Tujie, utusaidie, tumshinde atusongaye! Kwani watu hawawezi kutuokoa.

¹²Kwa nguvu yake Mungu na tufanye nasi yenye nguvu! Yeye ndiye atakayewakanyaga watusongao.