Kumwomba Mungu wokovu mikononi mwa wachukivu wabaya.

¹Mungu, isikie sauti yangu, nikikulalamikia!

²Unilinde, nikae na kutengemana, mchukivu akinitisha!

³Unifiche, njama zao wafanyao mabaya zisinijie, wala fujo yao wafanyao mapotovu!

⁴Ndimi zao wamezinoa, ziwe zenye ukali kama wa upanga, mishale yao, wanayotaka kuipiga, ni maneno machungu.[#Sh. 57:5.]

⁵Hujificha, wapate kumpiga mishale amchaye Mungu, mara wanampiga, kisha hawaogopi.[#Sh. 11:2.]

⁶Hushikana mioyo, wazidishe ubaya, maongezi yao ni hayo tu, jinsi watakavyotega matanzi. Yuko nani atakayeyaona? ndivyo, wanavyosema.[#Sh. 94:7.]

⁷Huwaza makorofi kwa kusema: Tumeijua mizungu yote. Yaliyomo mioyoni mwao kila mmoja hayachunguziki.

⁸Lakini Mungu atakapowapiga mishale, mara watakuwa wameumia.

⁹Ndimi zao ndizo zilizowaangusha, wote watakaowaona hivyo watawasimanga.[#Sh. 7:16.]

¹⁰Ndipo, watu wote watakapoogopa, wataungama kwamba: Ni kazi ya Mungu! Ndivyo, watakavyoyatambua matendo yake.

¹¹Hapo mwongofu atafurahia kuwa wa Bwana, amkimbilie, nao wote wenye mioyo inyokayo watashangilia.