Mungu huwashinda wachukivu wote.

¹Mungu akiinuka, hutawanyika walio adui zake, nao wamchukiao hukimbia machoni pake![#4 Mose 10:35.]

²Kama moshi unavyopeperuka, ndivyo, wanavyopeperuka; kama nta inavyoyeyuka motoni, ndivyo, wanavyoangamia usoni pake Mungu wao wasiomcha.

³Lakini waongofu hufurahi na kushangilia kwa kuchangamka na kuona furaha mbele ya Mungu.

⁴Mwimbieni Mungu, nalo Jina lake lishangilieni! Mtengenezeeni njia apitaye nyikani! Bwana ni Jina lake, mpigieni vigelegele![#Yes. 40:3; 57:14.]

⁵Ni baba yao wafiwao na wazazi, nao wajane huwaamulia, ni Mungu akaaye pake, napo ni patakatifu.[#Sh. 10:14.]

⁶Ni Mungu apaye wakiwa nyumba za kukaa, hutoa wafungwa kifungoni, nao wafanikiwe, lakini kwao wabishi, watakakokaa, ndiko kukavu.

⁷Mungu, hapo, ulipotoka kuwatangulia wao walio ukoo wako, napo hapo, ulipokwenda kukanyaga kwenye jangwa,[#2 Mose 13:21; Amu. 5:4-5.]

⁸ndipo, nchi ilipotetemeka, nazo mbingu zikanyesha maji, Mungu huyu alipotokea kule Sinai, alipotokea yeye Mungu aliye Mungu wao Waisiraeli.[#2 Mose 19:16-18.]

⁹Mvua ifurikayo ukiinyesha, Mungu, ilikuwa kila mara, fungu lako lilipotaka kuzimia; ndivyo, wewe ulivyolishikiza.

¹⁰Walio kundi lako wakapata pa kukaa, nao wanyonge ukawashikiza, Mungu, kwa wema wako.

¹¹Wenye kulitangaza neno, alilolitoa bwana, ni kikosi kikubwa.[#Yes. 52:7.]

¹²Wafalme wa vikosi watakimbia, watakimbia kweli, nao wanawake wenye nyumba watagawanya mateka.

¹³Hapo, mnapolala kambini, yapo yanayomerimeta, yanafanana na mabawa ya kwenzi yang'aayo kama fedha, nayo manyoya yake humetuka kama dhahabu.[#Amu. 5:16.]

¹⁴Mwenyezi alipowatawanya wafalme wale, mara kuling'aa kama theluji kulikokuwa na giza kuu.[#Amu. 5:4-5; 9:4.]

¹⁵Mlima wake Mungu ni mlima wa Basani, ule mlima wa Basani ulio wenye vilima huko kileleni.

¹⁶Ninyi milima yenye vilima kileleni juu, sababu gani mnautazama kwa kijicho mlima ule Mungu alioupenda, akae pale? Kweli Bwana atakaa pale kale na kale[#Sh. 132:13.]

¹⁷Magari yake Mungu ni maelfu na maelfu, hayahesabiki, Bwana anayo kule Sinai kwenye Patakatifu pake.[#2 Fal. 6:17; Dan. 7:10.]

¹⁸Ulipopaa juu, uliteka mateka, nako kwa watu ukayapokea waliyokupa; hata wabishi hawana budi kukaa kwake Bwana Mungu.[#Ef. 4:8-10.]

¹⁹Bwana na atukuzwe siku kwa siku! Mungu hututwika mzigo, lakini hutusaidia kuuchukua.[#1 Kor. 10:13.]

²⁰Mungu, tuliye naye, ndiye Mungu aokoaye, mwenye njia za kutoka nako kufani ni Mungu Bwana.

²¹Lakini vichwa vyao wachukivu wake Mungu ataviponda, nazo tosi zao wafulizao kukora manza zitachujuka.

²²Bwana alisema: Nitawatoa kule Basani, niwarudishe, nitawatoa namo vilindini mwa bahari, niwarudishe.

²³Ndipo, utakapoiogesha miguu yako katika damu, nazo ndimi za mbwa wako zitapata mafungu yao kwa adui zako.

²⁴Watu huwatazama wanaokuendea, Mungu, wakimwendea patakatifu aliye Mungu wangu hata mfalme wangu.[#Sh. 24:7; 2 Sam. 6:13-14.]

²⁵Waimbaji wanakwenda mbele, wapiga mazeze huwafuata, katikati ni wanawali wapigao patu.[#2 Mose 15:20.]

²⁶Mnapokusanyika mtukuzeni Mungu Bwana, ninyi mnywao maji kisimani kwao Waisiraeli![#Yes. 48:1.]

²⁷Wako wa Benyamini aliye mdogo, tena huwatawala, wako wakuu wa Yuda walio vikosi vizima, wako wakuu wa Zebuluni, nao wa Nafutali!

²⁸Mungu wako ameviagiza vitakavyokupa nguvu; Mungu, ufulize kuyatia nguvu uliyotufanyizia!

²⁹Kwa ajili ya Nyumba yako iliyo ya kutambika sharti wafalme wakupelekee matunzo huko Yerusalemu.[#Sh. 72:10,15.]

³⁰karipia nyama wakaao bwawani! ndio wakorofi wote, huwa ng'ombe wakali wanaowakanyaga ndama, kwani ni fedha tu, wanazozitamani. Nayo makabila ya watu wapendao vita yatapanye kabisa!

³¹Ndipo, wakuu wa Misri watakapotokea, nao watu weusi, ndio watakaoviinua mikono yao kumwelekea Mungu.[#Sh. 87:4; Yes. 19:21; Tume. 8:27.]

³²Mwimbieni Mungu, ninyi wafalme wa nchi, pamoja wa watu! Mshangilieni aliye Bwana!

³³Ni yeye akaliaye mbingu zilizoko kule juu, nazo ni za kale, ni yeye avumishaye sauti yake, ikinguruma na nguvu.

³⁴Mkuzeni Mungu kuwa mwenye nguvu! Waisiraeli ndio, uliowatokea utukufu wake, nguvu zake ziko juu mawinguni.[#Sh. 29:1.]

³⁵Mungu, unaogopesha toka Patakatifu pako, Mungu wa Isiraeli; yeye ndiye atakayeupa ukoo wake nguvu za kushupaa. Na atukuzwe yeye Mungu![#Sh. 29:11.]