Kuomba wokovu siku za kusimangwa na kusongwa.

¹Na uniokoe, wewe Mungu![#Sh. 45:1.]

²Kwani yamekuja maji ya kuipata roho yangu.

³Ninazama bwawani pabonyekapo, nisione pa kusimama, nimeingia katika vilindi vya maji, mkondo wao ukanididimiza.

⁴Nikachoka kwa kupiga kelele, mmeo ukakauka, nikizidi kumtazamia Mungu wangu, macho yakanizimia.

⁵Wanaonichukia bure ni wengi kuliko nywele za kichwani pangu, adui zangu watakao kunimaliza kwa kunionea wamepata nguvu, nashurutishwa kuyarudisha nisiyoyapokonya.[#Sh. 35:19; Yoh. 15:25.]

⁶Wewe Mungu unaujua upumbavu wangu, nazo manza, nilizozikora, hazikufichika kwako.

⁷Usiache, kwa ajili yangu mimi wapatwe na soni wakungojeao wewe, Bwana Mungu Mwenye vikosi! Kwa ajili yangu mimi wasisimangike wakutafutao wewe, Mungu wa Isiraeli!

⁸Kwani ni kwa ajili yako wewe, nikivumilia mabezo, ijapo soni ije kuufunika uso wangu.[#Sh. 44:23.]

⁹Nimekwisha kuwa mgeni kwao ndugu zangu, watoto wa mama yangu hawanijui, kama si mtu wa kwao.[#Sh. 38:12; Iy. 19:13; Mat. 10:36.]

¹⁰Kwani kwa ajili ya Nyumba yako wivu unanila, nayo masimango yao wanaokusimanga yameniguia mimi.[#Yoh. 2:17; Rom. 15:3.]

¹¹Nikalia pamoja na kujiumiza kwa kufunga, lakini wao wananisimangia navyo hivyo.

¹²Nikatumia gunia kuwa vazi langu, nikawa kwao kama fumbo.

¹³Wanaokaa langoni hunicheka, nao walevi hupiga mazeze ya kunifyoza.[#Iy. 30:9.]

¹⁴Lakini mimi ninakulalamikia, Bwana, mpaka utakapopendezwa. Mungu, kwa upole wako mwingi uniitikie na kunionyesha welekevu wako nao wokovu wako![#Yes. 49:8.]

¹⁵Nitoe kwenye matope, nipate kusimama, niokoke mikononi mwao wanichukiao namo vilindini mwa maji!

¹⁶Mkondo wa maji usinididimize, wala bwawa lisinimeze! wala kisima kisinifungie njia ya kutoka!

¹⁷Bwana, kwa upole wako ufanyao mema na uniitikie! Kwa kunionea uchungu mwingi na unigeukie!

¹⁸Usimfiche mtumishi wako uso wako! Kwani nimesongeka, usikawe kuniitikia!

¹⁹Ifikie roho yangu karibu, uikomboe! Kwa ajili ya wachukivu wangu niokoe!

²⁰Wewe unayajua matusi na matwezo na masimango yaliyonipata, mbele yako wewe wako wote wanisongao.

²¹Hivyo, ninavyotukanwa vimenivunja moyo, hata nikaugua; nikangoja, kama yuko mwenye huruma, lakini hakuna; nikangoja, kama yuko mtuliza moyo, lakini sikumwona.[#Omb. 1:2,9.]

²²Kilaji, walichonipa, ni maji ya nyongo, napo, nilipopatwa na kiu, walininywesha siki.[#Mat. 27:34,48.]

²³Sharti meza zao ziwawie matanzi, walipizwe mabaya yao wakinaswa nayo![#Rom. 11:9-10.]

²⁴Macho yao sharti uyafanya kuwa giza, wasione kabisa, viuno vyao sharti uvitetemeshe siku zao zote!

²⁵Yamwage makali yako, yawapate, nao moto wa machafuko yako sharti uwafikie!

²⁶Sharti mahame tu yawe pao pa kukaa, asioneke atakayekaa hapo, walipotua![#Tume. 1:20.]

²⁷Kwani uliyempiga wewe, wanamkimbiza, nayo maumivu yao, uliowaumiza, wanayasimuliana.[#Yes. 53:4.]

²⁸Waache, wajiongezee manza kwa manza, wasije kufika hapo, wongofu wako ulipo![#Rom. 1:24.]

²⁹Sharti wafutwe katika kitabu chao walio wenye uzima, wasiandikwe pamoja nao walio waongofu![#Luk. 10:20.]

³⁰Lakini mimi ni mkiwa mwenye maumivu, wokovu wako, Mungu, ndio utakaonitia nguvu.

³¹Nitalitukuza Jina la Mungu na kuliimbia, kwa kumshukuru nitamkuza.

³²Hivi vitampendeza Bwana kuliko ng'ombe, ijapo awe dume lenye pembe na kwato kubwa.[#Sh. 50:8-14.]

³³Maskini wakiviona watafurahi, nayo mioyo yenu ninyi mnaomtafuta Mungu na irudishwe uzimani.[#Sh. 22:27.]

³⁴Kwani Bwana huwasikia wasio na mali, nao walio wake wakifungwa, hawabezi.

³⁵Mbingu na nchi na zimtukuze, nazo bahari navyo vyote vinavyotembea humo!

³⁶Kwani Mungu atauokoa Sioni atakapoijenga miji ya Yuda, watu wakae humo na kuitunza!

³⁷Navyo vizazi vya watumishi wake vitaitwaa, nao walipendao Jina lake watakaa humo.