Bwana huwaamulia waliosongwa.

¹Bwana Mungu wangu, nimekukimbilia wewe. Nisaidie, uniokoe mikononi mwao wote wanikimbizao![#1 Sam. 24:10; 26:19; 2 Sam. 16:5-11.]

²Wasiirarue roho yangu kama simba, wakainyafuanyafua, nisipopata mwokozi![#Sh. 10:8-9.]

³Bwana Mungu wangu, kama yako mambo, niliyoyafanya, kikawamo kipotovu mikononi mwangu,[#Iy. 31:7-34.]

⁴kama nimemkorofisha mwenzangu, tuliyepatana naye, naye aliyenisonga bure nikamwokoa:

⁵basi, mchukivu na aikimbize roho yangu, aikamate na kunikanyaga hapo chini, anitoe uzimani, nao utukufu wangu aukalishe mavumbini!

⁶Inuka, Bwana, kwa makali yako! Jikweze, ukinge moto wa makorofi yao wanisongao! Amka, uje kwangu wewe uliyeagiza kuhukumu.

⁷Mkutano wa makabila ya watu sharti ukuzunguke, kisha hapo, walipo, urudi kuwa juu yao!

⁸Bwana ndiye atakayewahukumu watu wote; nami niamulie, Bwana, kwa kuwa mwongofu pasipo kosa, nifanyalo.[#Sh. 18:21-27.]

⁹Ubaya wao wasiomcha Mungu sharti ukomeshwe, lakini mwongofu umshikize, apate kusimama! Mwenye kujaribu mioyo na mafigo ni wewe, Mungu mwongofu.[#Sh. 104:35; Yer. 11:20; 17:10; Ufu. 2:23.]

¹⁰Ngao yangu iko kwake Mungu, naye huwaokoa wao wanyokao mioyo.[#Sh. 3:4.]

¹¹Mungu ni mwamuzi mwenye wongofu, ni Mungu atishaye kila siku:[#Sh. 9:5.]

¹²mtu akikataa kugeuka, ataunoa upanga wake, nao uta wake ataupinda na kuuelekeza.[#5 Mose 32:41; Omb. 2:4; 3:12.]

¹³Vyombo viuavyo ndivyo, atakavyopachika humo, nayo mishale yake ataiwakisha moto.

¹⁴Mwenye kujifunga, atokeze kiovu, mtazameni: huwa kama mwenye mimba ya kuzaa maumivu, lakini anapozaa, ni madanganyo ya kumdanganya yeye!

¹⁵Akiwa amechimba shimo na kulitanua, hutumbukia mwenyewe mlemle mwenye mwina, alioutengeneza yeye.[#Fano. 26:27.]

¹⁶Maumivu yake ya kuumiza wengine humrudia kichwani pake, nayo makorofi yake humshukia utosini.

¹⁷Kwa ajili ya wongofu wake namshukuru Bwana, naliimbia Jina lake Bwana Alioko huko juu.