Kumwombea mfalme mema.

¹Mungu, mpe mfalme kuamua, kama unavyoamua! Naye mwana wa mfalme mpe wongofu ulio kama wako!

²Awahukumu walio ukoo wako kwa wongofu, nayo mashauri yao wanyonge wako ayanyoshe!

³Milima iwe yenye matengemano ya kuwagawia watu, navyo vilima vilevile kwa nguvu ya wongofu![#Sh. 85:9-13.]

⁴Walio wanyonge kwao atawaamulia, nao wana wao maskini atawaokoa, lakini wakorofi atawaponda.[#Sh. 72:12.]

⁵Jua likingali liko, watakuogopa wao wavizazi na vizazi, mwezi utakavyoviwakia.

⁶Atashuka kama mvua inyweshayo uchome, au kama manyunyu ya mvua yalegazayo nchi.

⁷Mwongofu atachipuka siku, atakazokuwapo; mpaka mwezi utakapokuwa hauko tena, utengemano utazidi.

⁸Atatawala, bahari inakoanzia, mpaka huko, inakoishia, tena kuanzia kwenye jito kubwa mpaka mapeoni kwa nchi.[#Zak. 9:10.]

⁹Wakaao nyikani watampigia magoti, sharti walambe mavumbi walio adui zake.[#Yes. 49:23.]

¹⁰Wafalme wa Tarsisi na wa visiwa watampelekea matunzo, nao wafalme wa Arabia na wa Saba wataleta mahongo.[#Sh. 68:30; 1 Fal. 10:1-2; Yes. 60:9.]

¹¹Wafalme wote pia watamwangukia, nao wamizimu wote watamtumikia.[#Sh. 2:8,10-12.]

¹²Kwani atamwopoa maskini amliliaye, hata mnyonge akosaye mwenye kumsaidia.[#Sh. 35:10; Iy. 36:15.]

¹³Atamhurumia akorofikaye naye mkiwa, aziokoe roho zao walio wakiwa.

¹⁴Atazikomboa roho zao mwao wanyang'anyi namo mwao wakorofi, maana damu zao ni zenye kiasi kikubwa machoni pake.[#Sh. 9:13.]

¹⁵Na akae akiwa mwenye uzima, wamgawie nazo dhahabu za Arabia! Na wamwombee pasipo kukoma, wamtukuze siku zote.[#Sh. 72:10; 84:10; Mat. 2:11.]

¹⁶Vilaji vifurike katika nchi mpaka juu milimani! Miti yake ya matunda na ivume kama miti ya Libanoni! Namo mijini watu na wazidi kuwa wengi kama majani uwandani!

¹⁷Jina lake na liwepo kale na kale! Siku zote, jua likingali liko, jina lake na lichipuke, watu wa mataifa yote wajibariki na kulitaja pamoja na kulishangilia.[#1 Mose 12:3; 22:18.]

¹⁸Na atukuzwe Bwana Mungu, Mungu wa Isiraeli!

Yeye peke yake ndiye afanyaye vioja!

¹⁹Jina lake tukufu na litukuzwe kale na kale!

Nchi zote na zijae utukufu wake! Amin. Amin.

²⁰Huu ndio mwisho wa maombo ya Dawidi, mwana wa Isai.