Kitabu cha tatu.

Mema yao wasiomcha Mungu mwisho wao ni kuangamia.

¹Kweli Mungu huwaendea Waisiraeli kwa kuwa mwema, ni wao wenye mioyo iliyong'aa

²Lakini mimi ilikuwa imesalia kidogo, miguu yangu ingalijikwaa; hakuna tena iliyosalia, nyayo zangu zingaliteleza.[#Sh. 94:18.]

³Kwani wenye majivuno naliwaonea wivu nilipowaona wasiomcha Mungu, wakikaa na kutengemana.[#Iy. 21:7.]

⁴Kwa maana hawaoni maumivu ya kuwaua, tena miili yao hunenepa.

⁵Katika masumbuko ya kimtu hao hawamo, wala mateso ya watu wengine hayawapati.

⁶Urembo wao ndio majivuno, mavazi yao ya kujifunika ndio ukorofi.

⁷Macho yao hujitokeza kwa kunona kwao nyuso, mawazo ya mioyo yao hufuliza kujikuza.[#Iy. 15:27.]

⁸Kwa ukorofi wao mbaya husema na kufyoza, kila wanaposema hujikweza.

⁹Maneno ya vinywa vyao huyawazia kuwa ya kimbinguni, lakini ndimi zao husema ya kiulimwenguni.

¹⁰Kwa sababu hii watu wa kwao hurudi upande wao wakipenda kujinywesha maji yao mengi.

¹¹Husema mioyoni: Mungu anavitambuaje? Uko utambuzi kwake yeye Alioko huko juu?[#Sh. 10:11.]

¹²Tazama, hivyo ndivyo, wasiomcha Mungu walivyo, ndivyo, wanavyojituliza kale na kale kwa kulimbika mali.

¹³Ni bure kweli, nikiuangalia moyo wangu, uwe umetakata, nikiinawa mikono yangu kwa maji yaondoayo makosa?

¹⁴Nikawa nimeteseka mchana kutwa, nayo mapatilizo yangu yalikuwa yako kila kulipokucha.

¹⁵Kama ningaliwaza kwamba; nami niseme kama wao hao, kweli walio kizazi cha watoto wako ningaliwaacha, nikavunja agano.

¹⁶Basi, nikayatia moyoni, niyatambua hayo; lakini nilipoyatazama, yakaniwia mazito,

¹⁷mpaka nikapaingia Patakatifu pake Mungu; ndipo, nilipoyatambua kwa kutazama, jinsi mwisho wao ulivyo.

¹⁸Kweli uliwaweka penye utelezi, ukawaangusha, wapondeke.

¹⁹Kumbe mara wameangamia na kutoweka kabisa! Mwisho wao ukawa wa kuustukia.

²⁰Kama ndoto inavyoisha kwa kuamka, ndivyo, unavyozitowesha sura zao ukiwainukia.

²¹Hapo, nilipoona uchungu moyoni mwangu, nayo mafigo yangu yaliponiumiza na kunichoma,

²²ndipo, mimi nilipokuwa jinga, nisijue kitu, nikawa machoni pako kama nyama.

²³*Lakini sasa nitaandamana na wewe pasipo kukoma, maana umenishika kuumeni kwangu,[#Rom. 8:35-39.]

²⁴ukaniongoza njia kwa shauri, ulilolipiga wewe, mwisho utanikaribisha huko, utukufu uliko.

²⁵Huko mbinguni yuko mwingine aliye mwenzangu? Sipendezwi tena na ulimwengu huu nikiwa pamoja nawe.

²⁶Ijapo, mwili wangu uzimie pamoja na moyo wangu, wewe Mungu u mwamba wa moyo wangu, tena u fungu langu la kale na kale.[#Sh. 16:5.]

²⁷Hii ni kweli: Wakukaliao mbali hupotea, unawaangamiza wote wanaokuacha kwa kuzifuata tamaa.

²⁸Lakini mimi naona kuwa vema, nikimkalia Mungu karibu. Bwana Mungu ninamtaka kuwa kimbilio langu, niwasimulie watu matendo yako yote.*