Kumtukuza Mungu, kwa kuwa ni mshindaji.

¹Kwa mwimbishaji, wa kuimbia mazeze. Wimbo wa Asafu wa kushukuru. Mungu hujulikana kwao Wayuda, Jina lake ni kubwa kwao Waisiraeli.[#Yoh. 10:14.]

²Kituo chake kiko huko Salemu, nalo Kao lake liko huko Sioni.[#Sh. 132:13.]

³Huko ndiko, alikovunjia mishale ya upindi, hata ngao na panga na mata yo yote ya kupigia vita.[#Sh. 46:10.]

⁴Kwa utukufu wako wewe unaogopesha, maana huipita ile milima ya wanyang'anyi kwa kuwa mkubwa.

⁵Wenye mioyo mikali walitekwa nao, wakalala usingizi kwa kuangushwa wale wenye nguvu wote pia, mikono yao ikawalegea.

⁶Kwa makaripio yako, Mungu wa Yakobo, waliomo garini waliangushwa, wakazimia roho pamoja na farasi.

⁷Wewe unaogopesha kweli; atakayesimama mbele yako wewe, moto wa makali yako ukitokea, atapatikana wapi?

⁸Ulipotangaza maamuzi toka mbinguni, nchi ikashikwa na woga, ikanyamaza kimya;[#Sh. 46:11; Hab. 2:20.]

⁹ndipo, Mungu alipoinuka kuwaamulia watu, apate kuwaokoa wanyonge wote walioko nchini.

¹⁰Kwani makali ya watu nayo hukutukuza, mwisho utauzima nao moto wa makali yao utakapojifunga.

¹¹Mkimwapia, mlipeni Bwana Mungu wenu! Wote wakaao na kumzunguka sharti wampelekee matunzo, kwani yeye hutisha, aogopwe sana,[#2 Mose 15:11; 5 Mose 7:21.]

¹²huzikata roho zao walio wakuu, nao wafalme wa nchi huwaogopesha.