Kuomba sana msaada.

¹Kwa mwimbishaji. Wimbo wa Asafu, aliomtungia Yedutuni. Nimpaliziaye sauti yangu, ndiye Mungu; ninapomwita Mungu, hunisikiliza.[#Sh. 39:1; 62:1.]

²Siku ya kusongeka kwangu nilimtafuta Bwana; mikono yangu ikawa imenyoshwa usiku kucha pasipo kulegea, maana roho yangu ilikataa kutulizwa.

³Nikimkumbuka Mungu nampigia kite, roho yangu ikitaka kuzimia, ninayawaza yote.

⁴Unayashika macho yangu, yasisinzie; lakini siwezi kusema kwa kuhangaika.

⁵Ndipo, ninapoyawaza yale mambo ya siku za kale, ndiyo yale ya ile miaka iliyokwisha kupita.[#Sh. 143:5.]

⁶Usiku nayakumbuka mazeze yangu humu moyoni mwangu, roho yangu ikitafuta njia ya kuyatambua hayo:

⁷Bwana atanitupa kale na kale? Hataendelea tena kunipendezesha?[#Sh. 85:6.]

⁸Huruma yake imekwisha kale na kale? Agano, aliloliwekea vizazi na vizazi, limekoma?

⁹Mungu ameyasahau magawio ya kuwapa watu? Au ameukataza upole wake kwa kukasirikia?

¹⁰Nikasema: Maumivu haya yananipasa, ni miaka ya mkono wake wa kuume yule Alioko huko juu.

¹¹Haya matendo ya Bwana nitayakumbuka, navyo vioja vyako vya kale nitavikumbuka kweli.

¹²Ninayaweka moyoni yote, uliyoyafanya, nipate kuziwaza vema hizo kazi zako.

¹³Njia yako, Mungu, ni takatifu; yuko wapi aliye mungu mkuu kama Mungu?[#2 Mose 15:11.]

¹⁴Wewe ndiwe Mungu afanyaye vioja, nguvu zako hutambulikana kwa koo za watu.

¹⁵Uliwakomboa kwa mkono wako walio ukoo wako, hawa wana wa Yakobo nao wa Yosefu.

¹⁶Yalipokuona, Mungu, maji ya bahari, yalipokuona majihayo, ndipo, yalipostuka, vilindi navyo vikatetemeka.[#Sh. 104:6-7.]

¹⁷Mawingu yakanyesha mvua yenye maji mengi, mishale yako ikapiga huko na huko, nako mbinguni kukanguruma,

¹⁸Sauti za ngurumo zako zikasikilika katika kimbunga, nchini pakamulikwa na umeme, nchi ikatetemeka na kuyumbayumba.[#Sh. 18:8,14.]

¹⁹Namo baharini ndimo, njia yako ilimo, nako kwenye maji mengi ukapita, lakini nyayo zako hazikutambulika.

²⁰Walio ukoo wako uliwaongoza kama kundi la kondoo kwa mikono yao hawa: Mose naye Haroni.[#2 Mose 12:37; 14:22.]