Ubishi wa Waisiraeli haukukomesha welekevu wa Mungu.

¹Ninyi mlio ukoo wangu, yasikilizeni mafundisho yangu! Yategeni masikio yenu, msikie, kinywa changu kinavyoyasema!

²Nitakifumbua kinywa changu, kiseme mifano na kuwaambia mafumbo yaliyo ya kale.[#Sh. 49:4-5; Mat. 13:35.]

³Tuliyasikia, tukayajua, maana waliotusimuliani baba zetu.[#2 Mose 13:14; 5 Mose 4:9-10.]

⁴Nasi tusiyafiche wana wao, wao wa vizazi vijavyo tuwasimulie mashangilio ya Bwana nayo matendo yake ya nguvu ya kustaajabisha, aliyoyafanya yeye.

⁵Alisimika mashuhuda kwao Wayakobo, akaweka maonyo kwao Waisiraeli, akawaagiza baba zetu, wayafundishe, wana wao wayajue,

⁶kusudi wao wa vizazi vijavyo nyuma wayajue nao, kwamba nao watakapokua wayasimulie watoto wao,

⁷wapate kumwegemea Mungu na kumjetea, wasizisahau kazi zake Mungu, wayashike maagizo yake,

⁸wasiwe kizazi, kama hicho cha baba zao: chenye ubishi na ukatavu, chenye mioyo isiyopaelekea hapo pamoja, tena chenye roho zisizomtegemea Mungu.[#5 Mose 32:5-6.]

⁹Wana wa Efuraimu walikuwa mafundi wa kupiga mishale, lakini siku ya kupiga vita walirudi nyuma.[#Amu. 2:11-13; 12; 2 Sam. 20.]

¹⁰Agano la Mungu hawakulishika, wakakataa kuyafuata Maonyo yake.

¹¹Wakayasahau matendo yake, hata vioja vyake, alivyowaonyesha.

¹²Alifanya vioja machoni pao baba zao katika nchi ya Misri shambani kwa Soani.[#Yes. 19:11.]

¹³Alipasua bahari, akawapitisha mlemle akiyasimamisha maji yake kuwa kama ukingo.[#2 Mose 14:21-22.]

¹⁴Akawaongoza mchana kwa wingu, nao usiku wote kwa mwanga wa moto.[#2 Mose 13:21.]

¹⁵Akapasua magenge kule nyikani, akawapa maji mengi ya kunywa, kama viko vilindi.[#2 Mose 17:6; 4 Mose 20:7-11.]

¹⁶Kulikokuwa na miamba tu ndiko, alikotokeza vijito, akavifurikisha maji, yatelemke kama ya mito mikubwa.

¹⁷Kisha wakafuliza kumkosea tena, wakakataa jangwani kumtii yule Alioko huko juu.

¹⁸Wakamjaribu Mungu mioyoni mwao, wakitaka kwake vilaji viwapendezavyo rohoni mwao.[#2 Mose 16:3; 4 Mose 11:4.]

¹⁹Wakamnung'unikia Mungu wakisema: je? Mungu ataweza kututandikia meza huku nyikani?

²⁰Kweli alipopiga mwamba, maji yakatoka, vijito vikaenda; lakini atawezaje kutupa navyo vilaji? nazo nyama atatupatiaje sisi tulio ukoo wake?

²¹Naye Bwana alipovisikia alichafuka sana, moto ukawashwa wa kuwala wao Wayakobo, makali yakawafokea wao Waisiraeli.[#4 Mose 11:1.]

²²Kwani hawakumtegemea yeye Mungu, wala hawakungojea, awaokoe.

²³Naye akaagiza mawingu yaliyoko juu, akaifungua milango ya mbinguni,

²⁴akawanyeshea Mana, wapate kula; ndio ngano zambinguni, alizowapa.[#2 Mose 16:4,14-15.]

²⁵Wakala kila mtu huo mkate wa malaika; hivyo aliwapelekea pamba za njiani za kushiba.

²⁶Kisha akatokeza mbinguni upepo wa maawioni kw ajua, akauvuta nao upepo wa kusini kwa nguvu zake.

²⁷Akawanyeshea mvua kama ya mavumbi, ndio nyama wa kula, ni ndege warukao, wengi mno kama mchanga wa ufukoni.

²⁸Akawaangusha kambini kwao po pote, walipokuwa wamepanga.

²⁹Wakala, wakashiba sana, alipowapa, wazikomeshe tamaa zao;[#4 Mose 11.]

³⁰lakini hizo tamaa zao hawakuziacha, hivyo vilaji vyao vilipokuwa vikingalimo vinywani mwao bado.

³¹Hapo ndipo, makali ya Mungu yalipomkwea kwa ajili yao, waliokuwa wenye nguvu akawaua, nao vijana wa Isiraeli akawalaza uvumbini.[#4 Mose 11:33.]

³²Katika mambo hayo yote wakamkosea tena, hata vioja vyake hawakuvitegemea.

³³Kwa hiyo alizimaliza siku zao upesi, wakawa kama mvuke, miaka yao ikapita upesi sana, alipowaangamiza kwa mastuko.

³⁴Napo hapo, alipowaua hivyo, ndipo, walipomtafuta, wakarudi na kumtazamia machana kutwa.[#4 Mose 14:23.]

³⁵Wakamkumbuka Mungu kuwa mwamba wao, ya kuwa yeye Alioko huko juu ni mwokozi wao.

³⁶Lakini hata hapo walimdanganya na vinywa vyao, nazo ndimi zao zikamwongopea;

³⁷nayo mioyo yao haikumwelekea, wala Agano lake hawakulitegemea.

³⁸Lakini kwa kuwahurumia akazifunika manza zao, asiwaangamize, akayarudisha makali yake, yaende nyuma kabisa, asiuchochee moto wote wa machafuko yake.

³⁹Akawakumbuka kuwa wenye miili ya kimtu tu, kuwa upepo upitao pasipo kurudi.[#Sh. 103:14-16.]

⁴⁰Je? Mara ngapi walimchokoza nyikani, wakamsikitisha jangwani?[#4 Mose 14:22.]

⁴¹Mara kwa mara walirudi nyuma, wamjaribu Mungu; ndivyo, walivyomsumbua Mtakatifu wa Isiraeli.

⁴²Hawakukumbuka, ya kuwa ni mkono wake uliowakomboa siku ile ulipowatoa mikononi mwake aliyewasonga.

⁴³Naye ndiye aliyevifanya vielekezo vyake katika nchi ya Misri, navyo vioja vyake shambani kwa Soani:[#Sh. 78:12.]

⁴⁴maji ya mito yao aliyageuza kuwa damu, wasiweze kuyanywa yale maji yao.[#2 Mose 7:19-20.]

⁴⁵Akatuma kwao mbu, wawale, hata vyura, wawamalize.[#2 Mose 8:6,24.]

⁴⁶Mashamba yao akawapa funutu, navyo, vyakula, walivyovipanda na kusumbuka, akawapa nzige.[#2 Mose 10:13.]

⁴⁷Mizabibu yao akaivunja kwa mvua ya mawe, kwa hiyo mvua ya mawe ikafa nayo mikuyu yao.[#2 Mose 9:25.]

⁴⁸Hata ng'ombe wao akawatoa, wapigwe nayo hiyo mvua ya mawe, nao mbuzi wao akawamaliza kwa umeme.

⁴⁹Akatuma kwao moto wa makali yake, tena machafuko na machungu na masongano mengine; lilikuwa kundi zima la malaika waliowapelekea mabaya.

⁵⁰Akayafungua makali yake, yajiendee tu, hakuzitoa roho zao katika kufa, ila aliwaacha, kipindupindu kiwashike, wajifie.[#2 Mose 9:15.]

⁵¹Akampiga kila mzaliwa wa kwanza katika nchi ya Misri, wote waliokuwa malimbuko yenye nguvu katika mahema ya Hamu.[#1 Mose 10:6; 2 Mose 12:29.]

⁵²Lakini walio ukoo wake walitoka, akiwachunga kama kondoo, akawaongoza kama kundi la mbuzi huko nyikani,[#Sh. 77:20.]

⁵³akawasafirisha vizuri, wasishikwe na woga, lakini adui zao bahari iliwafunika.[#2 Mose 14:19,22,27.]

⁵⁴Akawafikisha kwenye mpaka wa Patakatifu pake, penye ule mlima, ambao ulijipatia mkono wake wa kuume.[#2 Mose 15:17.]

⁵⁵Akawafukuza wamizimu mbele yao, akawaagiza kugawiana nchi zao kwa kuzipigia kura, kila apate fungu lake, ndilo liwe urithi wake, akayakalisha mashina ya Isiraeli katika mahema yao.

⁵⁶Lakini walimjaribu Mungu alioko huko juu na kumchokoza, hawakuyashika maagano yake, aliyoyashuhudia,

⁵⁷wakarudi nyuma kwa udanganyifu wao kama baba zao, wakapinduka kama upindi usiotegemeka.[#Hos. 7:16.]

⁵⁸Kwa kutambika vilimani juu wakamkasirisha, kwa kuvitambikia vinyago vya wakamtia wivu.[#5 Mose 32:21.]

⁵⁹Moto wa makali ukamkwea Mungu, alipoyasikia, akawatupa Waisiraeli kabisa kabisa.

⁶⁰Akaliacha Kao lake kule Silo, ni lile hema, ambalo alikaa humo kwenye watu.[#1 Sam. 1:3; 4:11.]

⁶¹Wale, aliowatia nguvu, akawatoa, wafungwe, waliokuwa urembo wake akawatia mikononi mwao waliowasonga.

⁶²Walio ukoo wake akawaacha, wauawe na panga, wao waliokuwa fungu lake akawatolea makali yake.

⁶³Moto ukawala vijana wao wanawali wao hawakuimbiwa nyimbo za ndoa.

⁶⁴Watambikaji wao wakauawa kwa panga, nao wajane wao hawakuwaombolezea.[#1 Sam. 4:17,20.]

⁶⁵Kisha Bwana aliamka kama mtu aliyelala usingizi, kama mwenye nguvu anayepiga shangwe akiondoka kwenye mvinyo.

⁶⁶Akawapiga waliowasonga, akawarudisha nyuma, nayo masimango ya kale na kale ndiyo, aliyowapatia.

⁶⁷Akakitupa kituo cha Yosefu, nao ukoo wa Efuraimu hakuuchagua.[#Sh. 78:9.]

⁶⁸Akauchagua ukoo wa Yuda na mlima wa Sioni, alioupenda.[#2 Mambo 6:6.]

⁶⁹Akapajenga Patakatifu pake, paende juu kabisa, pawe kama nchi, aliyoiweka ya kuwapo kale na kale.

⁷⁰Kisha akamchagua mtumishi wake Dawidi, aje kumtumikia; kwenye mazizi ya kondoo ndiko, alikomchukua.[#1 Sam. 16:11-12.]

⁷¹akamtoa kwenye kondoo wanyonyeshao, awachunge walio ukoo wake Yakobo pamoja nao walio fungu lake Isiraeli.[#2 Sam. 7:8.]

⁷²Akawachunga kwa kuwa mwenye moyo uliotakata wote, kwa kuwa mikono yake iliijua kazi hiyo, akawaongoza.