Kumwomba Mungu mbaraka mpya.

¹Bwana, ulikuwa umependezwa na nchi yako, tena ulikuwa umerudisha mateka yake Yakobo.

²Walio ukoo wako ukawaondolea manza, walizozikora, makosa yao yote ukayafunika.

³Machafuko yako yote ukayatuliza na kuuzima moto wa makali yako.

⁴Mungu uliye mwokozi wetu, uturudishe! Ukomeshe uchungu, ulio nao kwa ajili yetu!

⁵Makali yako yatukalie kale na kale? Au utayaeneza hayo makali yako, yafikie vizazi na vizazi?[#Sh. 77:8.]

⁶Hutatuchangamsha tena, kwa kuturudisha uzimani, walio ukoo wako wakufurahie?

⁷Bwana, tupe kuuona tena huo upole wako, ukitugawia wokovu wako sisi nasi!

⁸Mungu Bwana atakayoyasema, ninataka kuyasikia, kwani wao walio ukoo wake nao wanaomcha huwaambia maneno yenye utengemano, wasirudie tena ujinga wao.[#Sh. 72:3.]

⁹Kweli wokovu wake uko karibu kwao wamwogopao, utukufu upate kukaa katika nchi yetu.

¹⁰Upole na welekevu sharti ukutaniane, nao wongofu na utengemano sharti unoneane!

¹¹Ndivyo, welekevu utakavyochipuka katika nchi, wongofu ukiitazama toka juu mbinguni.

¹²Ndipo, Bwana atakapotupa hayo mema tena, ndipo, nchi yetu nayo itakapotupa mazao yake tena.

¹³Utakaokwenda mbele yake ndio wongofu, tena ndio utakaofuata hapo, alipopita, upatengeneze kuwa njia.*