Kumwomba Mungu katika mateso.

¹Bwana, liinamishe sikio lako, uniitikie! Kwani mimi ni mnyonge, hata mkiwa.

²Ilinde roho yangu! Kwani mimi ninakucha. Wewe Mungu wangu, mwokoe mtumishi wako aliyekuegemea![#Sh. 18:21-27.]

³Wewe Bwana, nihurumie! Kwani ninakulilia mchana kutwa.[#Sh. 6:3.]

⁴Roho ya mtumishi wako ifurahishe! Kwani ninakuinulia roho yangu, ikutazamie, Bwana.

⁵Kwani wewe Bwana u mwema, unapenda kuondoa makosa, upole wako ni mwingi kwao wakuliliao.[#Sh. 86:15.]

⁶Sikia, Bwana, ninayokuomba! Sauti ya malalamiko yangu itegee masikio!

⁷Siku, ninaposongeka, ninakuita, kwani unaniitikia.[#Sh. 50:15.]

⁸Miongoni mwa miungu hayumo aliye kama wewe, Bwana, hayumo awezaye kufanya matendo kama yako.[#Sh. 71:19.]

⁹Wamizimu wote, uliowafanya, watakuja, wakuangukie, nalo Jina lako, Bwana, watalitukuza.

¹⁰Kwani wewe u mkubwa, unafanya mataajabu, aliye Mungu niwewe peke yako.

¹¹Nifundishe, Bwana, njia yako, niendelee na kweli yako! Ushike moyo wangu, upende moja tu: kuliogopa Jina lako![#Sh. 27:11.]

¹²Nitakushukuru, Bwana Mungu wangu, kwa moyo wote na kulitukuza Jina lako kale na kale.

¹³Kwani upole wako, ulionitolea umekuwa mkubwa, ukaiopoa roho yangu kuzimuni chini ya nchi.

¹⁴Mungu, wako wenye majivuno walioniinukia, ni kundi zima la wakorofi, wanaitafuta roho yangu, lakini wewe hawakutaki kuwa machoni pao.

¹⁵Nawe wewe Bwana u Mungu mwenye huruma na utu, tena u mwenye uvumilivu na upole na welekevu mwingi.[#2 Mose 34:6.]

¹⁶Rudi upande wangu na kunihurumia! Mpe mtumishi wako nguvu ya kwako! Mwana wa mjakazi wako umwokoe![#Sh. 116:16.]

¹⁷Nifanyizie kielekezo kinipatiacho mema, wachukivu wangu wakione, waingiwe na soni, kwa kuwa wewe Bwana umenisaidia, ukanituliza moyo.