Kilio cha mgonjwa.

¹Wimbo wa wana wa Kora, waliomtungia mwimbishaji, auimbishe kama wimbo wa kwamba: Ugonjwa huinamisha. Fundisho la Hemani aliye wa ukoo wa Ezera.[#1 Mambo 6:33; 25:1.]

²Bwana Mungu uniokoaye, mchana ninakulilia, usiku nao sikuachi,

³sharti yafike kwako malalamiko yangu. Liinamishe sikio lako, nikikupigia kelele!

⁴Kwani roho yangu imeshiba kwa kuona mabaya, uzima wangu umekwisha, kuzimu kumenijia karibu.

⁵Ninahesabiwa kuwa mwenzao washukao shimoni, nimegeuka kuwa kama mtu asiye na nguvu hata kidogo.

⁶Kilalo changu kiko kwao waliokwisha kufa, ninafanana nao waliouawa vitani walalao makaburini; huwakumbuki tena waliokwisha kutengwa, watoke mkononi mwako.

⁷Umenilaza shimoni ndani ya nchi kwenye giza lililomo humo kuzimuni.

⁸Makali yako yamenilemea, mawimbi yako yote yamenikwelea.[#Sh. 42:8.]

⁹Wenyeji wangu umewahamisha, nisiwaone, ukaniweka kuwa tapisho kwao hao; hivyo, nilivyofungwa, sitaweza kutoka.[#Sh. 31:12; 38:12; 88:19.]

¹⁰Macho yangu yamefifizwa kwa kuumia, ninakulilia, Bwana, mchana kutwa na kukunyoshea wewe mikono yangu.

¹¹Je? Utafanya kioja kwenye wafu? Au vivuli vitainuka, vikushukuru?[#Sh. 6:6.]

¹²Je? Mambo ya upole wako yanasimuliwa makaburini? Au mambo ya welekevu wako yanasimuliwa kuzimuni?

¹³Je? Vioja vyako vinatambulikana kwenye giza? Au wongofu wako katika nchi ikaayo walioyasahau yote?

¹⁴Lakini mimi ninakupigia kelele wewe, Bwana, malalamiko yangu hufika kwako asubuhi na mapema.

¹⁵Mbona unaitupa roho yangu, wewe Bwana? Mbona unauficha uso wako, nisiuone?

¹⁶Mimi ni mnyonge na mwele toka utoto wangu, nikayavumilia mastuko yako, kisha nikazimia.

¹⁷Makali yako yenye moto yamenikwelea, matetemeko yako yakanizimisha roho.

¹⁸Yalinizunguka siku zote kama maji, yakanizinga na kunisonga pawapo pote.

¹⁹Wenzangu wapendwa umewahamisha, nisiwaone tena; wenyeji wangu waliosalia ni giza tupu.[#Sh. 88:9.]