Kitabu cha nne.

Mungu ni kimbilio letu.

¹Bwana, wewe ndiwe kimbilio letu kwa vizazi na vizazi.

²Milima ilipokuwa haijazaliwa bado, hata nchi na ulimwengu zilipokuwa hazijaumbwa bado, wewe Mungu ulikuwa uko tangu kale hata kale.

³Unawageuza watu kuwa mavumbi tena ukiwaambia: Rudini, ninyi wana wa watu![#1 Mose 3:19; Mbiu. 1:4; 12:7.]

⁴Kwani machoni pako miaka elfu ni kama siku ya jana, ikiisha kupita, au kama zamu moja ya usiku.[#2 Petr. 3:8.]

⁵Kama watu wanavyochukuliwa na maji, ndivyo, unavyowadidimiza; kama usingizi wa asubuhi ulivyo, ndivyo, walivyo nao, au kama maua yanayochanua upesi:[#Sh. 102:12; 103:15; Iy. 14:2; Yes. 40:6-7.]

⁶asubuhi hupasua na kuchanua, jioni hupakatika na kunyauka.

⁷Kwani tunamalizika kwa makali yako, maana tunatoweshwa na moto wa machafuko yako.

⁸Manza, tulizozikora, unaziweka machoni pako, makosa, tuliyoyaficha, hutokea mwangani mwa uso wako.

⁹Kwa hiyo siku zetu zote zinapita upesi kwa machafuko yako, tunaimaliza miaka yetu kuwa kama mapuzi tu.

¹⁰Siku zetu za kuwapo ni miaka sabini, kama tunazidi kuwa wenye nguvu, ni miaka themanini. Nayo masumbuko na mateso ndio urembo wao; kwa kuwa tunaruka kama ndege, zinapita upesi.[#Mbiu. 1:3,8.]

¹¹Lakini yuko nani azitambuaye nguvu za makali yako? Tena yuko nani ayaogopaye hayo machafuko yako?

¹²Tufundishe kuzihesabu siku zetu, tujipatie mioyo yenye ujuzi![#Sh. 39:5; 1 Mose 47:9; Rom. 6:23.]

¹³Rudi, Bwana! Utatukalia mbali mpaka lini? Walio watumishi wako wahurumie!

¹⁴Tushibishe upole wako kila kunapokucha! Ndivyo, tutakavyoshangilia kwa furaha siku zetu zote.

¹⁵Siku za kutufurahisha ziwe sawasawa nazo, ulizotutesa, ziwe miaka mingi, kama ilivyokuwa ile ya kuona mabaya.

¹⁶Matendo yako na yaonekane kwa watumishi wako, nao utukufu wako kwa wana wao!

¹⁷Nao wema wake Bwana Mungu wetu na utukalie! Kazi za mikono yetu zifanikishe kwetu! Kazi za mikono yetu uzifanikishe kweli!*