Kumngojea Bwana ni kuzuri.

¹Akaaye fichoni kwake alioko huko juu, alalaye kivulini kwake aliye Mwenyezi

²humwambia Bwana: Kimbilio langu, tena ngome yangu, Mungu wangu, nimwegemeaye![#Sh. 18:3.]

³Kwani yeye ndiye aniokoaye tanzini mwa mwindaji, namo mwenye kipindupindu kiangamizacho.[#Sh. 124:7.]

⁴Kwa manyoya yake atakufunika, namo mabawani mwake ndani utakimbilia, welekevu wake ni ngao, hata kingio.

⁵Hutaogopa mastusho ya usiku, wala mshale upigwao mchana,

⁶wala kipindupindu kinyatiacho gizani, wala magonjwa mengine mabaya yauayo na mchana.

⁷Kama wataanguka elfu zima upande wako, au maelfu kumi kuumeni kwako, lakini kwako wewe hayatafika.

⁸Kweli, macho yako yenyewe yatavitazama; jinsi wasiomcha Mungu wanavyolipishwa, utaviona.[#Sh. 54:9.]

⁹Kwani wewe ulisema: Bwana ni kimbilio langu, naye Alioko huko juu unamtumia kuwa kao lako.

¹⁰Hakuna kibaya kitakachokufikia mwako nyumbani, wala hakuna pigo litakalokikaribia kituo chako.

¹¹Kwani atakuagizia malaika zake, wakulinde katika njia zako ziwazo zote.[#Mat. 4:6.]

¹²Nao watakuchukua mikononi mwao, usije kujikwaa mguu wako katika jiwe.

¹³Utakanyaga simba nao nyoka, utaponda kwa mateke wana wa simba nao nondo.[#Luk. 10:19.]

¹⁴Kwa kuwa ameshikamana na mimi, nitamwopoa, kwa kuwa analijua Jina langu, nitamkweza.

¹⁵Atakaponiita, nitamwitikia, mimi niko pamoja naye katika masongano, nimwokoe, kisha nimpe hata utukufu.

¹⁶Wingi wa siku zake za kuwapo ndio, nitakaomshibisha, nimchangamshe, akiuona huo wokovu wangu.