Kumshukuru Mungu aliye mwenye kuzihukumu nchi zote.

¹*Mwimbieni Bwana wimbo mpya! Mwimbieni Bwana, nchi zote![#Sh. 33:3.]

²Mwimbieni Bwana! Likuzeni Jina lake! Utangazeni wokovu wake siku kwa siku!

³Wasimulieni wamizimu utukufu wake nako kwenye makabila yote ya watu mataajabu yake!

⁴Kwani mkuu ni Bwana, apaswa na kutukuzwa sana, naye anaogopesha kuliko miungu yote.

⁵Kwani miungu yote ya makabila ya watu ni ya bure tu, lakini Bwana ndiye aliyezifanya mbingu.

⁶Ukuu na urembo uko mbele yake, uwezo na utukufu upo Patakatifu pake.

⁷Ninyi mlio wa ukoo wa watu, mpeni Bwana yaliyo yake! Kwa kuwa ni mtukufu na mnguvu, mpeni Bwana yaliyo yake!

⁸Kwa kuwa jina lake ni tukufu, mpeni Bwana yaliyo yake! Chukueni vipaji vya tambiko, mje kuziingia nyua zake![#Sh. 72:10.]

⁹Mtambikieni Bwana na kuvaa mapambo yapasayo Patakatifu! Mkimtokea, mastuko na yawaguie, ninyi wa nchi zote!

¹⁰Tangazeni kwa wamizimu kwamba: Bwana ni mfalme! Yeye ndiye aliyeishikiza nchi, isije kuyumbayumba, yeye ndiye atakayewaamulia watu maamuzi yanyokayo.*[#Sh. 93:1.]

¹¹Kwa hiyo mbingu na zifurahi, nchi nayo na ipige shangwe! Hata bahari nayo yote yajaayo ndani yake na yavume![#Sh. 98:7-9; Yes. 49:13.]

¹²Mashamba nayo yote yaliyomo na yapige vigelegele! Itakuwa, nayo miti yote ya mwituni imshangilie Bwana,

¹³kwani ndiye atakayekuja kweli kuihukumu nchi, atauhukumu ulimwengu kwa wongofu, nayo makabila ya watu kwa welekevu wake.[#Tume. 17:31.]