Mapigo matatu ya kwanza.

¹Nikasikia sauti kuu iliyotoka Jumbani mwa Mungu, ikiwaambia wale malaika saba: Nendeni, mvimwage nchini vile vyano saba vya makali ya Mungu![#Ufu. 15:7.]

²Pakaondoka wa kwanza, akakimwaga chano chake nchini. Ndipo, majipu maovu na mabaya yalipowatokea hao waliokuwa na chapa cha yule nyama, nao waliokiangukia kinyago chake.[#2 Mose 9:10-11.]

³Wa pili alipokimwaga chano chake baharini, ndipo, ilipogeuka kuwa damu kama ya mfu; kwa hiyo vikafa mle baharini vyote vilivyokuwamo vyenye uzima.[#2 Mose 7:17-21.]

⁴Wa tatu alipokimwaga chano chake katika mito na katika chemchemi za maji, ndipo, nayo yalipogeuka kuwa damu.[#2 Mose 7:19-24.]

⁵Kisha nikamsikia yule malaika wa maji, akisema: Wewe u mwongofu, uliopo, uliyekuwapo, unatakata, kwa kuwa umehukumu hivyo:

⁶waliomwaga damu za watakatifu na za wafumbuaji umewapa damu, wazinywe; ndivyo, ilivyowapasa.

⁷Kisha nikaisikia meza ya Bwana, ikisema: Kweli Bwana Mungu Mwenyezi, hukumu zako ni za kweli na za wongofu.[#Ufu. 9:13; 19:2.]

Pigo la nne na la tano.

⁸Wa nne alipokimwaga chano chake juani, ndipo, lilipopewa kuwaunguza watu kwa moto.

⁹Lakini watu walipounguzwa kwa kuchomwa na moto sana wakalitukana Jina la Mungu aliyekuwa na nguvu ya mapigo hayo, wakakataa kujuta na kumtukuza yeye.[#Ufu. 9:20-21; 16:11,21.]

¹⁰Wa tano alipokimwaga chano chake kitini mwa kifalme mwa yule nyama, ndipo, ufalme wake ulipotiwa giza, wenyewe wakaziuma ndimi zao kwa kuumia sana,[#2 Mose 10:21; Yes. 8:21-22.]

¹¹wakamtukana Mungu wa mbingu kwa ajili ya maumivu yao, na ya majipu yao, wakakataa kujuta na kuyaacha matendo yao.[#Ufu. 16:9.]

Pigo la sita na la saba.

¹²Wa sita alipokimwaga chano chake mle katika mto mkubwa wa Eufurati, ndipo, maji yake yalipokupwa, kusudi njia itengenezwe ya wafalme watakaotoka maawioni kwa jua.[#Ufu. 9:14; Yes. 11:15-16.]

¹³Nikaona pepo tatu zenye uchafu, zikitoka domoni mwa yule joka namo domoni mwa yule nyama namo domoni mwa yule mfumbuaji wa uwongo, zikawa kama vyura;[#Ufu. 12:3,9; 13:1,11-14; 2 Mose 8:3,7,11; 1 Fal. 22:21-23.]

¹⁴kwani ndizo roho za pepo zinazofanya vielekezo. Zikawatokea wafalme wa ulimwengu wote, ziwakusanye kupiga vita, siku kubwa ya Mungu Mwenyezi itakapotimia.[#Ufu. 13:13; 19:19.]

¹⁵Tazama, ninakuja kama mwizi. Mwenye shangwe ndiye atakayekesha na kuziangalia nguo zake, asitembee mwenye uchi, watu wakiyaona yake yenye soni.[#Ufu. 3:18; 1 Tes. 5:2.]

¹⁶Lakini zile pepo zikawakusanya wafalme mahali panapoitwa Kiebureo: Harmagedoni.[#Amu. 5:19,31; 2 Fal. 9:27; 23:29; Zak. 12:11.]

¹⁷Wa saba alipokimwaga chano chake angani, ndipo, sauti kuu ilipotoka Jumbani mwa Mungu upande wa kiti cha kifalme ikisema: Imekwisha kufanyika!

¹⁸Kukapiga umeme na uvumi na ngurumo, kisha kukawa tetemeko kubwa la nchi kupita yote yaliyokuwapo; tangu hapo, mtu alipokaa nchini, halikuwapo tetemeko lililokuwa kubwa kama hilo.[#Ufu. 4:5; 8:5; 11:19.]

¹⁹Ndipo, ule mji mkubwa ulipogawanyika kuwa mafungu matatu, hata miji ya wamizimu ikaanguka. Ndipo, nao mji mkubwa wa Babeli ulipokumbukwa mbele ya Mungu, upewe kinyweo cha mvinyo chungu ya makali yake.[#Ufu. 11:8; 14:8,10.]

²⁰Navyo visiwa vyote vikatoweka, hata milima haikuonekana tena.[#Ufu. 6:14; 20:11.]

²¹Kisha mvua kubwa ya mawe mazito yalinganayo na makonde ikawanyeshea watu toka mbinguni. Lakini watu wakamtukana Mungu kwa ajili ya pigo kuu la mvua ya mawe, kwani pigo lake lilikuwa kubwa mno.[#Ufu. 16:9; 2 Mose 9:23.]