Mpenzi mke na mume wanaopendana.

¹Na aninonee kwa manoneo ya kinywa chake!

²Kwani upendo wako hupendeza kuliko mvinyo.

³Mafuta yako ya kupaka hunukia vema,

jina lako ni mafuta yaliyomiminwa,

kwa hiyo wanawali hukupenda.

⁴Nivute, nikufuate nyuma! Na tupige mbio!

Hata mfalme akiniingiza vijumbani mwake,

na tupige vigelegele kwa kukufurahia wewe!

Huo upendo wako tuutukuze kuliko mvinyo!

Wanakupenda kwelikweli.

⁵Mimi ni mweusi, lakini ninapendeza,

ninyi wanawake wa Yerusalemu!

Nafanana na mahema ya Kedari, tena na mazulia ya Salomo.

⁶Msinionee kwa kuwa mweusimweusi! Ni jua lililonichoma.

Wana wa mama yangu walinikasirikia,

maana waliniweka kuwa mlinzi wa mashamba ya mizabibu,

lakini hata shamba langu la mizabibu sikulilinda.

⁷Niambie wewe, mpendwa wa roho yangu: Unalishia wapi?

Tena ni wapi, unapowapumzishia kondoo, jua likiwa kali?

Mbona niwe kama mwenye kutangatanga penye makundi ya wenzako?

⁸“Usipopajua mwenyewe uliye mzuri kuliko wanawake wengine,

toka tu na kuzifuata nyayo za kondoo,

kavichunge vitoto vyako vya mbuzi matuoni kwa wachungaji!

⁹Ninakufananisha wewe, mpenzi wangu,

na farasi avutaye gari la Farao.

¹⁰Mashavu yako hupendeza kwa kili za nywele,

nayo shingo yako yenye ushanga.

¹¹Na tukutengenezee vikufu vya dhahabu

vyenye vifungo vya fedha.

¹²Mfalme akiwa anakaa mezani pake,

manukato yangu ya narada hutoa mnuko wao mzuri.”

¹³Mpendwa wangu ni kifuko cha manemane

kikaacho katikati ya maziwa yangu.

¹⁴Mpendwa wangu ni kichala cha mhina

kitokacho mizabibuni kwenye Engedi.

¹⁵Nikikutazama, mpenzi wangu, u mwanamke mzuri,

“u mwanamke mzuri kweli mwenye macho kama ya hua.”

¹⁶Wewe nawe, mpendwa wangu, u kijana mzuri, unapendeza kweli.

Malalo yetu ni majani mabichi.

¹⁷“Boriti za nyumba yetu ni miangati,

mbau zetu za kuzifunika kuta ni mvinje.”