Mwanamke anamtunukia mpendwa wake.

¹Mimi ni ua la uwago wa Saroni, ni nyinyoro ya mabondeni.

²“Kama ua lilivyo katikati ya miiba,

ndivyo, mpenzi wangu alivyo katikati ya wanawali.”

³Kama mchungwa ulivyo katikati ya miti ya msituni,

ndivyo, mpendwa wangu alivyo katikati ya vijana.

Kwa kumtunukia nilikaa kivulini kwake;

tunda lake ni tamu sana, nikilila.

⁴Akaniingiza nyumbani, wanyweamo mvinyo,

nayo bendera yake iliyokuwa juu yangu, ni upendo.

⁵Nitieni nguvu kwa maandazi ya zabibu, kaniinueni kwa machungwa!

Kwani mimi ni mgonjwa kwa kupenda sana.

⁶Mkono wake wa kushoto uko chini ya kichwa changu,

nao wa kuume unanikumbatia.

⁷“Nawaapisha ninyi, wanawake wa Yerusalemu,

nikiwataja paa na kulungu wake walioko porini,

msimwamshe, wala msimhangaishe yeye ninayempenda,

ila mwacheni tu, mpaka atakapopendezwa mwenyewe!”

⁸Iko sauti ya mpendwa wangu, naisikia, anakuja

akiruka milimani, akichezacheza vilimani.

⁹Mpendwa wangu anafanana na paa mume au na kijana wa kulungu.

Mtazame! Yuko akisimama nyuma ya kitalu chetu,

akichungulia madirishani, akaonekana penye vyuma vyao.

¹⁰Mpendwa wangu ananiita na kuniambia:

“Inuka, mpenzi wangu mzuri, uje hapa!

¹¹Kwani tazama! Kipupwe kimepita,

mvua nayo ikakoma, ikaenda zake.

¹²Maua yanaonekana katika nchi, siku za kuimba zimetimia,

sauti za hua zinasikilika katika nchi yetu.

¹³Mkuyu unaanza kuziivisha kuyu zake changa,

nayo mizabibu inachanua maua yanukayo vema;

inuka, mpenzi wangu mzuri, uje hapa!

¹⁴Hua yangu hapo ngomeni penye mwamba, ulijificha magengeni,

nipe kuuona uso wako, nipe kuisikia nayo sauti yako!

Kwani sauti yako ni tamu, nao uso wako unapendeza.

¹⁵Tukamatieni nyegere, nyegere wale wadogo!

Maana huiharibu mizabibu, nayo mizabibu yetu inachanua.”

¹⁶Mpendwa wangu ni wangu, nami ni wake yeye

alishaye penye nyinyoro.

¹⁷Mpaka jua la mchana lipunguke ukali, vivuli vikijiendea mbiombio,

geuka, mpendwa wangu, uruke kama paa au kijana wa kulungu,

milimani kwenye makorongo!