Welekevu wa mpenzi mke.

¹Nilipolala usiku nilimtafuta yeye, roho yangu inayempenda;

²Na niinuke, nizunguke mjini,

roho yangu inayempenda nimtafute barabarani na viwanjani;

³Walinzi wazungukao mjini waliponiona,

nikawauliza: Mmemwona yeye, roho yangu inayempenda?

⁴Nilipokwisha kuwapita kwenda mbele kidogo,

ndipo, nilipomwona yeye, roho yangu inayempenda.

Nikamshika, nisimwachie tena,

mpaka nikamwingiza nyumbani mwa mama yangu,

⁵“Nawaapisha ninyi, wanawake wa Yerusalemu,

nikiwataja paa na kulungu wake walioko porini,

msimwamshe, wala msimhangaishe yeye ninayempenda,

ila mwacheni tu, mpaka atakapopendezwa wenyewe!”

Utukufu wa mpendwa mume.

⁶Ni nani huyo apandaye kutoka nyikani?

Anafanana kuwa kama wingu la moshi lililo kama nguzo,

ni manemane na uvumba aliyovukiziwa

na mavumbi ya manukato yote ya mchuuzi yanukayo vizuri.

⁷Tazameni! Kiko kiti, ni cha kifalme cha Salomo!

Wanguvu sitini wanakizunguka, ndio wanguvu wa Waisiraeli.

⁸Wao wote wanashika panga, ni mafundi wa vita,

kila mmoja anao upanga wake kiunoni pake

wa kukingia mastusho ya usiku.

⁹Kiti hicho mfalme Salomo alijitengenezea kwa miti ya Libanoni,

¹⁰miguu yake aliifanya kwa fedha, maegemeo ni ya dhahabu,

pa kukalia ni nguo nyekundu za kifalme.

Hapo kati yako marembo mazuri mno yaliyoshonwa

na wanawake wa Yerusalemu ya kumpendeza mfalme.

¹¹Tokeni, wanawake wa Yerusalemu, mmtazame mfalme Salomo!

Amevika kilemba, mama yake alichomfunga siku ya ndoa yake,

maana ndiyo siku, moyo wake uliyoifurahia.