²Mpendwa wangu ameshuka kwenda bustanini pake,

kutembea bustanini penye matuta ya manukato,

³Mimi ni wake mpendwa wangu, naye mpendwa wangu ni wangu mimi;

Kuufurahia mkutano.

⁴“Kweli u mzuri kama Tirsa, unapendeza kama Yerusalemu,

tena unaogopesha, mpenzi wangu, kama vikosi vyenye bendera.

⁵Yageuze macho yako, yasinitazame, kwani hunitatanisha;

nywele zako zinafanana na kundi la mbuzi

walalao upande wa kushukia wa milimani kwa Gileadi.

⁶Meno yako ni kama kundi la kondoo wanaotoka kuogeshwa,

kwao hakuna hata mmoja aliye peke yake.

⁷Shavu lako huonekana mtandioni mwako

kuwa kama komamanga ipevukayo sana.

⁸Wako wanawake wa kifalme sitini na masuria themanini,

tena wako wanawali wasiohesabika.

⁹Lakini yuko mmoja tu aliye hua wangu na mwenzangu atakataye,

ni mwana wa pekee wa mama yake, aliyemzaa humpenda sana;

wanawali wenzake wakimwona humwazia kuwa mwenye shangwe,

nao wanawake wa kifalme na masuria humtukuza.”

¹⁰“Nani huyu mwanamke aonekaye kama mapambuzuko?

Ni mzuri kama mwezi, anang'aa kama jua,

anaogopesha kama vikosi vilivo vyenye bendera.”

¹¹Nilishuka kwenda bustanini penye milozi,

nijifurahishe kwa kuyaona machipukizi mapya yaliyoko bondeni;

tena nilitaka kuitazama mizabibu, kama imechanua,

nayo mikomamanga, kama imepata maua.

¹²Nilipokuwa siviangalii, roho yangu ikanipeleka,

ikaniweka penye magari, nayo yalikuwa ya wakuu wa kwetu.